Rusiya hökuməti martın 1-dən etibarən benzin ixracına altıaylıq müddətə qadağa qoyacaq.

Bəs bu qadağanın Azərbaycandakı neft təchizatına təsiri necə olacaq?

Mövzu ilə bağlı Sfera.az-a açıqlama verən iqtisadçı-ekspert Eldəniz Əmirov bildirib ki, Rusiyanın benzin ixracına qoyduğu 6 aylıq qadağanın Azərbaycanda benzin təhcizatına təsirlərini bilmək üçün son illərin idxal dinamikasına baxmaq lazımdır:

“Azərbaycan Rusiyadan 2021-ci ildə 148 min tona yaxın, 2022-ci ildə 99,5 min ton, 2023-cü ildə isə 40.2 min ton “Ai-95” markalı benzin idxal edib. Deməli, yuvarlaq götürsək, Rusiyadan idxal 2022-ci ildə 40%-dək, 2023-cü ildə isə 60%-dək azalıb. 

2023-cü ildə “Ai-92” markalı benzinin idxalı isə cəmi 17 min ton olmuşdur ki, bu da bu markadan olan benzinin ümumi idxalının cəmi 27%-nə bərabər olub".

Ekspertin sözlərinə görə, benzin idxalında da Rusiyadan asılılığın azalma dinamikası davam etdiyi üçün 2024-cü ildə daha az asılılığın olacağını deyə bilərik:

“Bu isə onu deməyə əsas verir ki, Rusyanın qadağası benzin çatışmazlığına səbəb olmayacaq, ən azı ona görə ki, bizdən və Rusiyadan fərqli olaraq Ai-95 markalı benzin istehsal edib satmağa yer axtaran ölkələr çoxdur”.

Sonda E.Əmirov qeyd edib ki, rəsmi Moskva ixraca qadağa qoymasını kənar amillərlə əlaqələndirməyə çalışsa da, əsas səbəb sanksiyaların istehal və emal proseslərinə təsiridir.

Firuzə Əliyeva