Azərbaycanda filmlər niyə uğur qazanmır? – AÇIQLAMA 

Filmlərin fərqli məqamlarda çəkilməsinin faydası çoxdur. Bir neçə məkanda çəkilən film böyük uğur qazandıqdan sonra həmin ərazilərə turist axını olur.

Sfera.az xəbər verir ki, bu barədə fikirləri kinotənqidçi Hacı Səfərov bildirib.

“Filmlərin bir çox funksionallığı var. Əksəriyyətində cəmiyyətdə olan problemlərə, ictimai məsələlərə toxunulur. Bu filmlər vasitəsilə insanlar həmin ictimai məsələlərdən xəbərdar olurlar. Filmlər yalnız əyləncə və qazanc məqsədilə deyil, maarifləndirmə məqsədilə də çəkilir. Filmlərin özlərində müəyyən etik kodlar və etik mesajlar olur”.

Hacı Səfərov qeyd edib ki, filmlərin artması məşğulluq prosesinə də təsir göstərir. Yəni bu sahəylə məşğul olan insanların, peşəkarların sayı artır.

“Daha çox insan bu sahəylə pul qazanır və iqtisadi güc yaranır. İqtisadi güc artan zaman film sahəsinə olan maraq da artır. Filmlər vasitəsilə insanların problemlərini ictimaiyyətə çatdırmaq mümkündür. Azərbaycan kinosunda kiçik büdcə ilə çalışan insanlar var ki, onların çəkdikləri filmlər beynəlxalq festivallarda uğur qazanırlar. Ancaq bu uğur və əldə olunan nəticə davamlı deyil. Artıq insanlar müəyyən müddət sonra könüllü işləmək istəmirlər. Bu işdən qazanc əldə etmək istəyirlər. İqtisadi güc olmadan çəkilən filmlər dayanıqlı olmur. Maliyyə olmadığı zaman avtomatik olaraq motivasiya da olmur. Ona görə insanlar film sahəsindən uzaqlaşmalı olurlar”.

Ülkər Abdurahmanlı