Su Çərşənbəsinin MARAQLI ADƏT-ƏNƏNƏLƏRİ
Bu gün Azərbaycanda Su çərşənbəsi qeyd olunur. Bu günlə bağlı keçmiş zamanlarda bir çox adət-ənənələr mövcud olub. Düzdür, indi bunların bir çoxu icra olunmur. Amma Novruz bayramının ab-havası məhz çərşənbələrə görə artıq hiss edilməyə başlayır.
Sfera.az Su çərşənbəsinin maraqlı adət-ənənələri ilə bağlı məlumatı təqdim edir.
Belə ki, keçmiş zamanlardan insanlar Su çərşənbəsində bulaq başına yollanırdı. Həmin gün hamı sübh tezdən axar suyun üstünə gedir, yeni suyu qarşılayır, xəstəliklərdən azad olacaqlarına, dərd bəlalarının su ilə gedəcəklərinə inanırdılar.
Digər adətlərdən biri, çərşənbə axşamı qızlar saçından kəsib axan çaya atırdı. Məqsəd isə bütün arzuların çin olması idi. Həmçinin, axar çaydan gətirilən suyu ağacların dibinə, evlərə səpirdilər ki, həmin il ruzili-bərəkətli olsun. Qızlar həm də bulaqdan, çaydan gətirdikləri suyu qablara qoyar, toplaşar və hər biri öz bəxti üçün üzüyünü saçına sürtüb suya atardı.
İnanca görə, üzük qabın kənarına toxunub neçə dəfə cingildəsə, o qızın da bəxti o sayda il sonra açılardı.
Gətirilən su ilə həm də xəmir yoğrulardı. Bunun mənası isə evin ruzili-bərəkətli olması ilə bağlı idi. Eyni zamanda, həmin su ilə aş dəmlənər, dəmlənmiş aşın suyunu bar verməyən ağacın dibinə tökərdilər ki, ağac bar versin.
Bu çərşənbədə insanlar arasında bir-birlərinin üzərinə su çiləmə adəti də var imiş. Bunu edərək, bir-birlərinin ağırlıqlarını götürdüklərini, üzərlərində olan neqativlikdən azad olduqlarını düşünürdülər.
Bu çərşənbədə süfrəyə mütləq həyatın simvolu olan su ilə dolu bir qab qoymaq vacibdir.
Eyni zamanda süfrədə təmiz sudan hazırlanmış pürrəngi çay olmalıdır. İnsanlar imkanı çatdığı qədər plov bişirilməli, süfrədə 7 adda nemət olmalıdır.
Xatırladaq ki, bu il Azərbaycanda Od çərşənbəsi martın 5-də, Yel çərşənbəsi martın 12-də, İlaxır - Torpaq çərşənbəsi isə martın 19-da qeyd olunacaq.
Ölkəmizə yaz fəsli martın 20-si Bakı vaxtı ilə saat 07:06:21-də daxil olacaq. Martın 20-21-i Azərbaycanda Novruz bayramı qeyd olunacaq.
Günay
