Dünyanın ən böyük şəhərlərindən biri su böhranı ilə ÜZLƏŞİB
Dünyanın ən böyük şəhərlərindən biri olan Meksikanın paytaxtı Mexiko ciddi su böhranı ilə üz-üzə qalıb.
Sfera.az CNN-ə istinadən xəbər verir ki, bələdiyyənin proqnozuna əsasən, 2024-cü ilin iyunun sonunda şəhərin kranlarında su “yox olacaq”.
Mexiko şəhərinin ehtiyaclarını ödəmək üçün yaradılan su anbarlarında suyun səviyyəsi tarixin ən aşağı səviyyəsinə düşüb. İllərdir az yağıntının olması və ərazidə yüksək temperaturun müşahidə edilməsi metropolda su qıtlığına səbəb olub.
Şəhərin digər ən böyük problemi su paylama şəbəkəsinin köhnəlməsidir. Şəhərdə paylanan suyun təxminən 40 faizi sızmalara görə itirilir.
Mexikodakı demoqrafik vəziyyət də su ilə təchizatı çətinləşdirir. Mexiko şəhərinin əhalisi digər yaşayış məntəqələrindən gələn insanların hesabına artmaqda davam edir. Son məlumata əsasən, şəhərin əhali sayı 9,2 milyon nəfəri, ətraf ərazilərdə yaşayanlarla birlikdə isə 21,8 milyon nəfəri ötüb. İndi əhali sayına görə Mexiko dünyanın 5-ci ən böyük şəhəridir.
Hazırkı vəziyyətdə yerli hakimiyyət su anbarlarından çəkilən suya ciddi məhdudiyyətlər qoymaq qərarına gəlib və əhaliyə verilən suyun həcmi 25 faiz azaldılıb.
Nəticədə, şəhərin bəzi yerlərində insanların daimi su ilə təminatı dayanıb. Ehtimal olunur ki, bu hal yayda şəhərin yarıdan çoxunda müşahidə ediləcək.
Vasif
