Avropanın Rusiyadan qaza görə asılılığı tarix olacaq - PLAN AÇIQLANDI

Avropada qaz istehlakı Rusiya-Ukrayna müharibəsinin başladığı tarixlə müqayisədə 20 faiz azalıb. 

Sfera.az xəbər verir ki, 2023-cü ildə Avropada qaz istehlakı son 10 ilin ən aşağı səviyyəsinə düşüb. Bunun başlıca səbəbi Avropa ölkələrində qaz istehlakında qənaət rejiminin tətbiqi və daha səmərəli vasitələrdən istifadəyə xərclənən vəsaitlərin artmasıdır. 

Təbii qaza tələbatın azalmasına əsasən Almaniya, İtaliya və Böyük Britaniya səbəb olub. Həmin ölkələr mayeləşdirilmiş təbii qaz (LNG) infrastrukturunun qurulmasına böyük məbləğdə vəsait xərcləyiblər. Bu ölkələrdə son 2 ildə 8 idxal terminalı fəaliyyətə başlayıb, 2030-cu ilə qədər daha 13 terminalın fəaliyyətə başlaması gözlənilir. 
Proqnozlaşdırılır ki, Avropanın LNG terminallarının sayı yaxın 10 il ərzində davamlı artırılacaq. Terminalların sayının nəzərdə tutulan həddə çatmasından sonra Avropa LNG qəbulunu 3 dəfə artıra biləcək. 

LNG tədarükünün artması Avropanın ABŞ, Kanada kimi uzaq regionlarda yerləşən istehsalçılardan da qaz alışını artıracaq.

Hələlik avropalılar yaxın bazarlardan LNG idxalını artırmağı üstün tutur. İlkin mərhələdə Rusiyadan LNG tədarükü 11 faiz artıb. Avropalı ekspertlər Rusiyanın sıxılmış qaz alışının müvəqqəti xarakter daşıdığını və gələcəkdə digər istehsalçılardan alışların artacağını proqnozlaşdırırlar. 

Vasif