"Bakının küçələri təhsilli, amma özlərini apara bilməyən insanlarla doludur" - Psixoloq

“Valideynlər bir çox hallarda uşaqların təhsilinə daha çox fokuslanırlar, nəinki, tərbiyəsinə”.

Bunu Sfera.az-a açıqlamasında klinik psixoloq Fuad Əsədov deyib. O qeyd edib ki, bu, yaxşı bir hal deyil:

“Bu, o deməkdir ki, uşaq istəmədiyi bir həyata doğru itələnir, bəzən və bütün ömrü boyu sevmədiyi işlə məşğul olacaq. Hər kəs universitet oxumalı deyil. Kimsə musiqiçi, ya da rəssam olmaq istəyirsə, ora yönələ bilər. Yeri gələndə, bu gün bir illik kurslarla çox peşəkar İT mütəxəssisi yetişdirilir. “Hamının uşağı universitet oxuyur, mənim uşağımın nəyi əskikdir onlardan” düşüncəsi ağlın eqoya uduzmasını təmin edir. Az valideyn övladı ilə vicdan, mənəviyyat və empatiya haqqında mütəmadi danışır. Amma təhsillə bağlı hər gün məsləhət verirlər. Buna görə də Bakının küçələri təhsilli, amma özlərini apara bilməyən insanlarla doludur. Bütün bu yerə zibil atanların, küçədə qışqıraraq danışanların, yol hərəkəti qaydaları pozanların, növbəni pozanların əksəriyyəti təhsilli insanlardır. Bir çox şeyi də bilirlər, amma mədəniyyət və etika xaricində”.

Psixoloq bildirib ki, valideynlər uşaqları sevgisiz qoyur:

“İndiki uşaqların əksəriyyəti sevgisiz böyüyür. Ya ərköyün böyüdürlər, ya da diqqətdən kənar...Həqiqətən, sevgi hiss edilmir. Ona görə də empatiya qura bilmirlər”.

Günay