“Ailəsində gördüklərini tətbiq edir” - Psixoloqdan həmin yeniyetmələrlə bağlı AÇIQLAMA

Xəbər verdiyimiz kimi, Bakıda yeniyetməyə qarşı həmyaşıdları tərəfindən zorakılıq olub.

Bəs həmin zorakılığı edən yeniyetmələrin bu cür davranışları hansı psixoloji amillərdən asılıdır?

Mövzu ilə bağlı Sfera.az-a danışan psixoloq Gülər Məmmədova bildirib ki, məktəbdə təhsil alan hər bir yeniyetmə öz ailəsinin güzgüsüdür.

“Yeniyetmələrin göstərdikləri davranışlar onların böyüdüyü psixoloji atmosferdən çox asılıdır. Bu cür uşaqlarda tərbiyə əskikliyi var. Genetik amillərdən qaynaqlanan nevrotik pozuntular da burada böyük rol oynayır. Bu cür uşaqlar ailədə gördükləri tərbiyə modelini cəmiyyətdə əks etdirirlər”.

Psixoloq qeyd edib ki, düzgün tərbiyə edilən uşaqlar bu tərz davranışlar sərgiləmirlər.

“Vəziyyət getdikcə acınacaqlı hal alır. Valideynlər yalnız pul qazanaraq övladlarına yaxşı gələcək verə biləcəklərini düşünürlər. Lakin bu düzgün yanaşma deyil. Valideyni ilə vaxt keçirə bilməyən, onlara dərdlərini rahatlıqla deyə bilməyən övladlar istər-istəməz pis vərdişlərə yönəlirlər. Bu zaman həmin uşaqlar kriminal aləmə meyillənir və yalnız özlərinə deyil, ətrafındakı insanlara da ziyan vururlar”.

Ülkər Abdurahmanlı