Avropada qaz ucuzlaşır, Azərbaycana da təsir edir

Avropada qaz qiymətləri bir qədər də azalıb. 

Sfera.az xəbər verir ki, bu gün mart ayında tədarükü həyata keçiriləcək təbii qazın qiyməti 2,5 faiz azalaraq min kubmetr üçün 270 dollardan da aşağı düşüb. 

Bu qiymət 7 iyun 2023-cü ildən bəri ən aşağı qiymətdir. 

Qazın ucuzlaşmasına səbəb qış fəsli başlayandan havaların mülayim keçməsi, eləcə də mayeləşdirilmiş təbii qazın (LNG) stabil tədarükünün təmin edilməsidir. Bunlardan başqa Avropanın qaz anbarlarında rekord həcmdə ehtiyatların yaradılması da qiymətlərə təsir edir.

Belə əlverişli vəziyyətdə son aylarda qaz qiyməti təxminən iki dəfə enib. 

Qeyd edək ki, mövcud qiymətlər Avropada gündəlik satılan qazın dəyərini ifadə edir. Azərbaycan da Avropaya qaz satır. Azərbaycanın satdığı qazın dəyəri uzunmüddətli müqavilələrlə müəyyənləşdirilir. Yəni mövcud qiymətlər Azərbaycanın satdığı qazın qiymətinə aid deyil. Amma qaz qiymətlərinin uzun müddət aşağı səviyyədə qalması Azərbaycanın da ixrac etdiyi qazın ucuzlaşmasına səbəb olur. 

Bunu ixraca dair məlumatlar da təsdiqləyir. 2023-cü ilin yanvarında Azərbaycan qazın hər min kub metrini 548 dollara satıb. Ancaq bu ilin yanvarında satılan qazın qiyməti 383 dollara düşüb. Bir ildə Azərbaycanın satdığı qazın qiyməti 30 faiz, yaxud 165 dollar azalıb. 

Deməli, Avropada qaz qiymətlərinin enməsi uzunmüddətli dövrdə Azərbaycanın ixrac etdiyi qazın da ucuzlaşmasına səbəb olur. 

Vasif