Bakının uzun illərdir davam edən problemlərindən biri də “Sovetski” adlanan ərazi ilə bağlıdır. "Sovetski"də gah "söküntü işləri başlandı", gah da "işlər dayandırıldı" başlığı ilə qarşımıza çıxan xəbərlərdən də aydın olur ki, Bakı meriyası bu ərazidə yenidənqurma işlərinə "barmaqarası" yanaşır. Ərazidə isə vəziyyət acınacaqlı hal alıb. 

Sfera.az bildirir ki, söküntü qalıqlarının, yarımçıq tikililərin olduğu yerlərlə bağlı sakinlərin də narazılığı pik həddə çatıb.

Belə ki, yağış, qar yağanda palçıqdan, küləkli havalarda isə toz-torpaqdan keçilməyən küçələrdən narazı olmamaq mümkün deyil. Hətta bu problem "Sovetski"nin azyaşlı sakinlərini də dilə gətirir.

Şagirdlər yağışlı, küləkli havalarda məktəbə getməyin çətin olduğunu dəfələrlə bildiriblər. Ərazi demək olar ki, narkomanların və sahibsiz itlərin oylağına çevrilib. Bu durum isə sakinləri xüsusi olaraq narahat edir. Çünki heç kim haqlı olaraq öz övladını, yaxınını sahibsiz itlərə, narkomanların saçdığı təhlükələrə qurban vermək istəmir.

Qəzalı vəziyyətdə olan yarımçıq tikililər də təhlükə mənbəyidir. Onlardan qoparaq düşəcək bir daş, taxta parçası isə yaşından asılı olmayaraq, o ərazidə yaşayan, oradan keçən istənilən şəxsi canından edə bilər... 

Sadaladıqlarımızdan aydın görünür ki, Bakının mərkəzindəki "Sovetski"də təhlükə ocağı var, ancaq məsələnin həlli yoxdur...

Bəs ölkə başçısının göstərişlərinə əsasən, ümumilikdə 26 hektar ərazini əhatə edən, abadlıq və yenidənqurma işlərinə 2013-cü ildə start verilən "Sovetski" ilə bağlı hansı layihələr var? İşlər nə zaman yekunlaşacaq?

Məsələ ilə bağlı Bakı Şəhər İcra Hakimiyyətinə müraciət etdik. Amma qurum yenə öz ampluasında idi. Bizi başqa bir quruma - Dövlət Şəhərsalma və Arxitektura Komitəsinə yönləndirdi.  Bildirildi ki, “Sovetski” ilə bağlı hansı layihələrin, işlərin olduğunu məhz onlar bilir.

Sonra Komitəyə müraciət etdik, onlar isə bizi Yasamal Rayon İcra Hakimiyyətinə "pas"ladı. Yasamal Rayon İcra Hakimiyyəti isə bizi yenidən Bakı Şəhər İcra Hakimiyyətinə yönləndirdi. Cavabsızlıq dairəsində yenə başladığımız yerə geri döndük.

Suallarımız cavabsız qaldı, faktlar isə həm əməkdaşımızın çəkdiyi fotolarda, həm də bütün əhalinin gözü qarşısındadır.

"Sovetski"dəki təhlükəli vəziyyəti isə Bakı Şəhər İcra Hakimiyyəti və hörmətli mer Eldar Əzizovdan başqa hamı görür, hamı bilir... Ancaq maraqlıdır, Eldar Əzizov nəyi gözləyir? Prezidentin göstərişinə illərdir niyə əməl olunmur?