“Qəbul imtahanlarının tez keçirilməsi nəticələrə mənfi təsir göstərir” - Ekspert

Xəbər verdiyimiz kimi, Dövlət İmtahan Mərkəzi bu il keçirilməsi nəzərdə tutulan ali təhsil müəssisələrinin bakalavriat səviyyəsinə qəbul imtahanları, sənəd qəbulu tarixləri, magistraturaya qəbul imtahanının II cəhdi, rezidenturaya qəbul, dövlət qulluğuna qəbul, eləcə də digər imtahanların tarixlərini açıqlayıb. İmtahanların, tədris ili bitmədən keçirilməsi isə bir sıra abituriyentlərin və bakalavrların narazılığına səbəb olub.

Bəs imtahanların tez keçirilməsi nəticələrə necə təsir göstərəcək?

Mövzu ilə bağlı Sfera.az-a danışan təhsil eksperti Kamran Əsədov bildirib ki, qəbul imtahanlarının tədris ilə yekunlaşmadan keçirilməsi heç bir halda doğru deyil. Tədris ilinin gedişində imtahan salmaq təhsil alanların tədris prosesinin pozulmasına səbəb olur. Orta ümumtəhsil məktəblərinin şagirdləri tədris prosesi bitmədən mart ayında buraxılış imtahanı, may ayında isə qəbul imtahanı verəcəklər. Bu isə özlüyündə məktəblərin fəaliyyətini iflic edir. Bu zaman, şagirdlər yalnız qəbul imtahanına hazırlaşırlar və dərsə getmirlər. Həmçinin, magistratura imtahanlarının belə tez keçirilməsi bakalavrların ali məktəblərdəki dərslərinə də mane olur. Aprel ayında keçiriləcək magistratura imtahanı isə diplom işi yazan və akademik borclarını yerinə yetirən tələbələrə problem yaradır. İmtahanların tədris prosesinin gedişində keçirilməsi onların nəticələrinə mənfi təsir göstərir".

Ekspert bildirib ki, qəbul imtahanlarının tədris ilinin sonunda keçirilməsi daha məqsədəuyğundur. “Belə olarsa tələbələr daha yüksək nəticə göstərə bilərlər”.

Ülkər Abdurahmanlı