ABŞ Yaxın Şərqdə müharibəyə hazırlaşır? - "Daşı daş üstündə qoymamaqda israrlıdır"

ABŞ Prezidenti Cozef Bayden administrasiyası İsrailə on milyonlarla dollarlıq silah-sursat göndərməyə hazırlaşır. Bu barədə “Wall Street Journal” məlumat yayıb. Bildirilib ki, Ağ Ev Qəzza zolağında atəşin kəsilməsində israr etdiyi halda, İsrailə 1000 “MK-82” bombası, “KMU-572” yüksək dəqiqlikli istiqamətləndirici komplektləri, “KMU-572” bombaları üçün partlayıcılar tədarük etməyi planlaşdırır.

ABŞ administrasiyası, Dövlət Departamenti və Pentaqon informasiyanı şərh etməkdən imtina ediblər.

ABŞ Yaxın Şərqdə müharibəyə hazırlaşır?

Bununla bağlı Sfera.az-a açıqlama verən siyasi şərhçi Kənan Novruzov deyib ki, Ağ Ev Şərqi Avropa ssenarisini Yaxın Şərqdə də təkrarlayır:

“Təsir göstərə bildiyi dövlət vasitəsilə həm düşmənlərinə qarşı mübarizə aparır, həm də regiondakı təsir gücünü artırmağa çalışır. Son vaxtlar mediada yayılan məlumatlara görə, ABŞ ilə İsrail arasında münasibətlərdə də müəyyən gərginlik yaranıb. Bunun birbaşa liderlər, yəni Cozef Baydenlə Benyamin Netanyahu arasında olduğu da iddia edilir. Çox güman, sözügedən fikir ayrılığı döyüş meydanındakı vəziyyətə görədir. Xatırladım ki, məhz döyüş əməliyyatları ilə bağlı olaraq Vaşinqtonla Kiyev arasında da fikir ayrılıqları var. Buna baxmayaq, ABŞ məhz öz maraqları naminə yenə də Ukraynadan tam üz döndərmir. Oxşar ssenari, ola bilsin, Yaxın Şərqdə də təkrarlanır”.

Müsahibimiz bildirib ki, “Wall Street Journal”ın dərc etdiyi məlumatın dezinformasiya olması ehtimalı da var:

“Odur ki, yayılan xəbərin nə qədər dəqiq olduğunu gələcək göstərəcək. Amma proseslər onu deməyə əsas verir ki, ABŞ Yaxın Şərqdə "daşı daş üstündə qoymamaqda" israrlıdır. Gələcəkdə müharibənin genişlənməsi, digər ərəb dövlətlərin İsrailə qarşı müharibəyə qoşulması, həmçinin Ankara - Vaşinqton xəttində gərginliyin artması məhz Ağ Evin hazırkı siyasətinin nəticəsi olacaq”.

Günay