Keçən il Avropa İttifaqında (Aİ) cəmi avtomobil satışları 10,5 milyona çatıb və elektrik avtomobillərin bazar payı artaraq dizel avtomobillərinin payını ötüb. 

Sfera.az xəbər verir ki, 2023-cü ildə Aİ-də satılan avtomobillərin 1,5 milyonu və ya 14,6 faizi elektromobillərdən ibarət olub. Dizel avtomobillərinin satışı isə 1,4 milyon ədədə çatıb və bazar payı 2022-ci ildəki 16,4 faizdən 13,6 faizə düşüb. 

Avropa Avtomobil İstehsalçıları Assosiasiyasının (ACEA) məlumatlarına görə, Aİ avtomobil bazarı keçən il 2022-ci ilə nisbətən 13,9 faiz artıb. Aİ-də benzinlə işləyən avtomobillər hələ də ən böyük bazar payına sahibdir. 2023-cü ildə satılan benzinlə işləyən avtomobillərin bazar payı 35,3 faiz olub. 

Aİ-də hibrid avtomobil satışları 2022-ci illə müqayisədə 29,5 faiz artaraq 2,7 milyon ədədə çatıb. Hibrid avtomobillər ümumi avtomobil bazarının dörddə birini təşkil edib. 2024-cü ilə dair açıqlanan proqnozlara əsasən, bu il satılacaq avtomobillərin 20 faizini elektromobillər təşkil edəcək. 

Elektrik avtomobillərinin satışında “Tesla”, “Wolkswagen” və “Renault” markaları ən əhəmiyyətli markalar kimi önə çıxır. 

Vasif