“Rusiyalı rəsmilər Ermənistan-Azərbaycan şərti sərhədində baş verən son insidentin Qərbin maraqlarına uyğun olduğuna işarə edirlər”.

Bunu Sfera.az-a açıqlamasında politoloq Elxan Şahinoğlu deyib:

“Kollektiv Təhlükəsizlik Müqaviləsi Təşkilatının Birləşmiş Qərargah rəisi, general-polkovnik Andrey Serdyukov fevralın 14-də açıqlama verərək Qərbin Bakı ilə İrəvan arasında postmünaqişə dövründə nizamlanmaya təsir göstərməyə çalışdığını bildirib. İki gün sonra Rusiya Federal Təhlükəsizlik Şurasının katibi Nikolay Patruşev Qərbin Cənubi Qafqazda vəziyyəti qarışdırmağa, Ermənistan-Azərbaycan həll prosesinə müdaxilə etməyə çalışdığını vurğulayıb”.

Politoloqun sözlərinə görə, Qərb mələk deyil, Ermənistanı yalançı vədlərlə inandırmağa çalışır:

“Ancaq son insidentdə Azərbaycan hərbçilərinə atəş açan “Yerkrapa” terror təşkilatının üzvləri olub. Onlar isə Birinci Qarabağ müharibəsindən bu yana Rusiyanın hərbi agenturasıyla bağlıdır”. 

E.Şahinoğlu sonda vurğulayıb ki, Azərbaycanın vasitəçiliyə ehtiyacı yoxdur:

“Azərbaycanla Ermənistan arasında Qərbin xüsusi vasitəçiliyinə ehtiyac olmadığı kimi, Rusiyanın da fəallığına ehtiyacımız yoxdur. 

Dövlət başçısı İlham Əliyev Milli Məclisdə andiçmə mərasimində fikrini aydın ifadə edib: “Vasitəçiyə ehtiyacımız yoxdur, gedin işinizlə məşğul olun!”. 

Bu sözlər həm Qərbə, həm də Rusiyaya aiddir”.

Firuzə Əliyeva