"Təxribatların sonu genişmiqyaslı toqquşma ilə nəticələnə bilər" - Politoloq 

Bu gün Azərbaycan Ordusunun mövqeləri yenidən atəşə tutulub. Bu dəfə Ermənistan silahlı qüvvələrinin bölmələri Basarkeçər rayonu ərazisindən Ordumuzun Daşkəsən rayonunun Təzəkənd yaşayış məntəqəsi istiqamətindəki mövqelərini iriçaplı silahlardan atəşə tutublar. Bu, artıq nəbz yoxlaması deyil. Azərbaycan mövqelərinin atəşə tutulması tendensiyaya çevrilməkdədir.

Sfera.az xəbər verir ki, bu barədə fikirləri politoloq Elxan Şahinoğlu bildirib.

Onun sözlərinə görə, bu, Azərbaycanla yanaşı, Ermənistanın baş naziri Nikol Paşinyana qarşı da təxribatdır:

“Ermənistanda Paşinyanın mövqelərini zəiflətmək üçün bölgədə gərginlik yaratmaq istəyən daxili və xarici qüvvələr fəallaşıblar və bu təxribatı Paşinyan Almaniyada olarkən reallaşdırıblar. Bizim üçün təxribatın kimin və ya kimlər tərəfindən həyata keçirilməsinin fərqi yoxdur, təxribatın icraçıları cəzlarını layiqincə alacaqlar. Bu təxribatların sonu genişmiqyaslı toqquşma ilə nəticələnə bilər. Azərbaycan Ordusu hər dəfə qarşı tərəfin təxribatına cavab olaraq genişmiqyaslı əməliyyatlara başlayıb və uğur qazanıb. Qarşı tərəf bu dəfə də özünə quyu qazmaqla məşğuldur”.

Ülkər Abdurahmanlı