"Sülh müqaviləsinin hazırlanması prosesinin davam edəcəyinə ümid edirik” - Kreml
“Moskva İrəvanı və Bakını vəziyyətin hazırkı gərginləşməsi ilə bağlı təmkinli olmağa çağırır və sülh müqaviləsinin hazırlanması prosesinin davam edəcəyinə ümid edir”.
Sfera.az xarici KİV-ə istinadən xəbər verir ki, bunu Kremlin mətbuat katibi Dmitri Peskov deyib.
“Şübhəsiz ki, Azərbaycan-Ermənistan təmas xəttindən gələn xəbər narahatedicidir, biz hər iki tərəfi təmkinli olmağa, qarşı tərəfin təxribat hesab edə biləcəyi hər hansı hərəkətdən hər şəkildə çəkinməyə çağırırıq. Biz çox diqqətlə izləyəcəyik və hər iki tərəflə təmaslarımızı davam etdirəcəyik”, - Kremlin sözçüsü jurnalistlərə bildirib.
Peskovun qiymətləndirməsinə görə, belə hadisələr ən azı bu prosesin irəliləməsinə, sülh müqaviləsinin hazırlanmasına kömək etmir:
"Ancaq ümid edirik ki, bu proses davam edəcək".
Qeyd edək ki, fevralın 12-də Azərbaycan Dövlət Sərhəd Xidmətindən verilən məlumata görə, Ermənistan ərazisindən Azərbaycan mövqelərinin atəşə tutulması nəticəsində bir Azərbaycan sərhədçisi yaralanıb.
Firuzə Əliyeva
