Magistraturaya qəbul olan bu şəxslərin təhsil haqqını DÖVLƏT ÖDƏYİR - SİYAHI

Xəbər verdiyiniz kimi, ali məktəblərin magistraturasına qəbul imtahanı keçirilib və imtahanın qapalı, həmçinin kodlaşdırıla bilən açıq tipli tapşırıqlar üzrə nəticələri elan edilib.

 
Bəs magistratura pilləsi üzrə ödənişli ixtisaslara və MBA üzrə ixtisaslara qəbul olanlardan kimlərə güzəşt edilir? Kimlər ödənişli ixtisaslarda pulsuz təhsil ala bilər?  

 
Elm və Təhsil Nazirliyindən Sfera.az-a verilən məlumata görə, mövcud qanunvericiliyə əsasən, ödənişli əsaslarla magistratura səviyyəsində təhsil alan və aşağıdakı sosial-həssas qrupdan olan şəxslərin təhsil xərcləri dövlət büdcəsinin vəsaiti hesabına ödənilir:

 
1. Məcburi köçkün statuslu şəxslər (dövlət təhsil müəssisələrində);

2. Orqanizmin funksiyalarının 61-100 faiz pozulmasına görə, habelə 18 yaşınadək əlilliyi müəyyən edilmiş şəxslər;

3. Valideynlərini itirmiş və valideyn himayəsindən məhrum olmuş uşaqlar (əyani təhsilalma formasında, 23 yaşadək);

4. Şəhid övladları;

5.Şəhid ailəsinin üzvü olan şəxslər (dövlət təhsil müəssisələrində, əyani təhsilalma formasında, 23 yaşadək);

6. Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi ilə əlaqədar əlilliyi müəyyən edilmiş vətəndaşların uşaqları;

7. Azərbaycan Respublikasının ərazi bütövlüyü uğrunda döyüş əməliyyatlarında iştirak etdiyinə görə “Müharibə veteranı” adı almış şəxslər.

 
Əlavə olaraq bildirilib ki, əhalinin aztəminatlı təbəqələrindən olan şəxslərin təhsilə əlçatanlığını təmin etmək məqsədilə Elm və Təhsil Nazirliyinin tabeliyində fəaliyyət göstərən Təhsil Tələbə Krediti Fondunun vəsaiti hesabına təhsil haqlarının ödənilməsi üçün əyani təhsil alan tələbələrə güzəştli təhsil kreditləri verilir.

Firuzə Əliyeva