Ermənistan təxribat törətməklə nəyə nail olmaq istəyir? - ŞƏRH
Fevralın 12-si saat 13:37-də Azərbaycan-Ermənistan şərti dövlət sərhədinin Zəngilan rayonu ərazisindən keçən hissəsində Ermənistan Silahlı Qüvvələrinin Qafan rayonunun Nerkin-And yaşayış məntəqəsi istiqamətində yerləşən mövqeyindən Dövlət Sərhəd Xidmətinin Sərhəd Qoşunlarının Zəngilan rayonunun Kolluqışlaq kəndi ərazisində yerləşən mövqeyinə açılan atəş nəticəsində bir hərbiçimiz boyun nahiyəsindən yaralanıb.
Ermənistan ordusunun Zəngilan istiqamətində atəş açması fonunda yaranan gərginlik 19 sentyabr antiterror hadisəsindən sonra ilk ciddi insidentdir. Aydındır ki, bu təxribat öncədən hazırlanıb və planlı şəkildə həyata keçirilib. Bunu yayılan görüntülərdə atəş açan hərbçinin snayper olması, özünə mövqe seçib, hazırlaşıb aktı icra etməsi də sübuta yetirir.Sülh prosesinin və sərhədin delimitasiyası müzakirələrinin getdiyi bir məqamda İrəvanın təxribat törətməsi diqqət çəkir. Məlum məsələdir ki, Ermənistanın niyyəti genişmiqyaslı müharibəyə başlamaq deyil. Çünki bunun üçün nə lazımi gücü var, nə də daxili-siyasi sabitliyi…
Mövcud təxribatlardan İrəvanın əldə etmək istədiyi bir neçə divident var:
Birincisi, Ermənistan Azərbaycanı bu tip təxribatlara çəkərək gərginliyi artırmaq, beləliklə Azərbaycana qarşı beynəlxalq təzyiq yaratmaq istəyir. Xüsusilə iki ölkə arasında sülh danışıqlarının getdiyi və rəsmi Bakının əlinin güclü olduğu bir zamanda bu, İrəvan üçün çox vacibdir.
Bir müddət əvvəl Prezident İlham Əliyev Azərbaycan mediasına müsahibəsində son 4-5 ayın ən sabit dövr olduğunu bildirmişdi. Belə vəziyyət – Bakının danışıqlar prosesində üstün olması İrəvan üçün arzuedilən deyil. Ermənistan Bakıya qarşı beynəlxalq təzyiq yaradaraq danışıqlar prosesində əlini gücləndirmək istəyir.
İkincisi, Ermənistanın indiki məqamda şərti dövlət sərhədində atəşkəsi pozması həm də xarici qüvvələrin istəyidir. Daha dəqiq desək, İrəvanı təxribata sürükləyən əsas ölkə Fransadır.
Aİ missiyasının genişləndirilməsi, Ermənistanın Hindistandan silahlar alması, Fransanın Ermənistanı silahlandırmasının regionda vəziyyətin gərginləşməsinə xidmət etdiyi Azərbaycan tərəfindən də dəfələrlə vurğulanıb. Fransa generalının Ermənistana səfəri, Azərbaycanla sərhəddə peyda olması və ardınca təxribatın baş verməsi də onu deməyə əsas verir ki, proseslərin pərdəarxasında Fransa dayanır.
Azərbaycan Silahlı Qüvvələri Ermənistanın fevralın 12-də törətdiyi və bir sərhədçimizin yaralanması ilə nəticələnən təxribata qisas əməliyyatı ilə cavab verdi. Bu gözlənilirdi. Çünki Prezident İlham Əliyevin də dediyi kimi, bir nəfər də olsun Azərbaycan əsgərinin qanı yerdə qalmayacaq.
Bundan başqa rəsmi Bakı qisas əməliyyatı ilə Ermənistana açıq şəkildə mesaj verdi ki, ən kiçik təxribat belə cəzasız qalmayacaq. Həmin döyüş postu dağıdıldı, postun şəxsi heyəti arasında ciddi itkilər var.
Baş verən bu hadisəyə görə bütün məsuliyyət Ermənistanın hərbi-siyasi rəhbərliyinin üzərinə düşür. Xüsusilə sülh prosesinin getdiyi, sabitliyin olduğu sərhədlərin təyin edildiyi bir zamanda bu, prosesi ləngidəcək. Bundan başqa təxriabtların davamlı olması rəsmi Bakının sərhədin qarşı tərəfində əməliyyatlar keçirməsi üçün də hüquqi baza yaradır.
İki ölkə arasında yekun sülh müqaviləsinin olmaması, rəsmi Bakının milli maraqlarını, habelə sərhədlərin toxunulmazlığını təmin etmək üçün sərhədin qarşı tərəfində əməliyyatlar keçirməsini zəruri edir. Bununla belə Azərbaycanın niyyəti sadəcə ərazi bütövlüyünü və sərhədlərin toxunulmazlığını təmin etməkdir”.
Müəllif: Politoloq Turan Rzayev
