Yanvarda qeyri-neft ixracı AZALDI – SON RƏQƏMLƏR

İqtisadi İslahatların Təhlili və Kommunikasiya Mərkəzi “İxrac icmalı”nın fevral sayının ilkin rəqəmlərini açıqlayıb. 

Sfera.az xəbər verir ki, ilkin məlumatlara əsasən, 2024-cü ilin yanvarında Azərbaycanın qeyri neft-qaz sektoru üzrə ixracı 222 milyon dollar olub.

Ötən ilin eyni dövrü ilə müqayisədə qeyri neft-qaz ixracında 22 faiz azalma baş verib. 2023-cü ilin birinci ayında qeyri neft-qaz mallarının ixrac dəyəri 284,5 milyon dollar olmaqla builki göstəricidən 62,5 milyon dollar çoxdur. 

Qeyri neft-qaz malları üzrə ixracda azalma qeyri-yeyinti məhsullarında baş verib. Yeyinti məhsulları üzrə ixrac ötən ilin müvafiq dövrü ilə müqayisədə 9,5% artaraq 70,4 milyon dollar, qeyri-yeyinti məhsulları üzrə ixrac isə 31,1 faiz azalaraq 151,6 milyon dollara bərabər olub.

2024-cü ilin ilk ayı ərzində bitki və heyvan mənşəli piylər və yağların ixracı 31,9%, meyvə-tərəvəz ixracı 21,2%, alüminium və ondan hazırlanmış məmulatların ixracı isə 17,4% artıb.

Cari ilin yanvar ayı ərzində aqrar və aqrar-sənaye məhsulları üzrə birgə ixracın statistik dəyəri 10,5% artaraq 74,1 milyon dolları təşkil edib. Qeyri neft-qaz ixracının tərkib hissəsində əhəmiyyətli yer tutan aqrar-sənaye məhsullarının ixrac dəyər isə 3,7 milyon dollar azalaraq 15,4 milyon dollar olub.

Vasif