Cəmiyyətdə məruz qaldığımız şiddət növlərindən biri də psixoloji şiddətdir. Psixoloji şiddətə biz, əsasən, ailədə məruz qalırıq.

Bəs psixoloji şiddətin qarşısını necə almaq olar?

Mövzu ilə bağlı Sfera.az-a danışan psixoloq Pərvanə Baxışova bildirib ki, insanların bacarıqlarının görməzdən gəlinməsi, psixoloji şiddətin başlıca əlamətlərindən biridir.

"Əsasən, valideynlər övladlarını digər uşaqlarla müqayisə edərək, onların psixologiyasına mənfi təsir göstərir. Cütlüklərin qısqanclıq adı altında daima bir-birilərini kontrol etməsi də psixoloji şiddət hesab edilir. İnsanları təkliyə sürükləmək üçün qohumlarından tanışlarından və dostlarından ayırmaq da bu şiddətin təzahür formalarından biridir. Bir insanı daima nəyəsə görə günahlandırmaq da, insanlara mənfi təsir edən psixoloji amillərdən biridir".

Psixoloq qeyd edib ki, qadınların xarici görünüşlərinin ələ salınması da geniş yayılmış psixoloji şiddət növlərindən biridir.

“Bu şiddətin ən ağır növlərindən biridir. Bu cür təzyiqə məruz qalan qadınlarda özgüvənsizlik və dəyərsizlik hissi formalaşır. Tək çıxış yolu, bu tərzdə psixoloji şiddətə məruz qalan insanların etiraz etmələridir. Onlar icazə verməməlidirlər ki, bu cür təhqirlərə və tənqidlərə məruz qalsınlar”.

Ülkər Abdurahmanlı