"DSMF 30 min manatımı banka qoyub pul qazanır, bəs mənə niyə..." - Ekspert ŞİKAYƏT ETDİ
“Mənim Dövlət Sosial Müdafiə Fondunda 30 min manatdan çox vəsaitim var. Fond mənim pulumu 7-8%-lə banka yerləşdirib ildə ən azı 2000-2500 manat pul qazanır.
Bəs mənə bu vəsaitdən niyə pay vermir?!”
Sfera.az xəbər verir ki, bu fikirləri Dövlət Sosial Müdafiə Fondunun (DSMF) investisiya siyasətini şərh edən zaman iqtisadçı-ekspert Natiq Cəfərli bildirib.
Xatırladaq ki, DSMF əvvəlki illərdə formalaşan 1 milyard 50 milyon manat vəsaitini Azərbaycanın ən böyük 5 bankına depozit şəklində yerləşdirib və bu banklardan faiz gəliri əldə edir.
N.Cəfərli hesab edir ki, DSMF bu cür investisiya siyasəti ilə fonda ödəniş edən şəxslərin hüquqlarını pozur: “DSMF gəlir əldə edənlərdən icbari qaydada vəsait toplayır. Hər bir gəlir əldə edən şəxsin fonda pul ödəmək öhdəliyi var. Əgər gəlir əldə edənlər ödəniş etməsə, onlar cəzalandırılırlar. Amma DSMF-nin fonda pul ödəyən şəxslər qarşısında fərdi məsuliyyəti yoxdur”.
N.Cəfərli bildirib ki, DSMF əhalidən topladığı vəsaiti banka depozit kimi qoyursa, əldə etdiyi gəlirin bir hissəsini də əhali ilə bölüşməlidir:
“DSMF bizim pulu banka qoyub faiz gəliri əldə edir və bunun adını “investisiya” qoyur. Yaxşı, DSMF mənim (əhalinin) pulumu banka qoyub faiz əldə edirsə, niyə həmin gəlirdən mənə pay vermir?! Şəxsən mənim DSMF-də 30 min manatdan çox vəsaitim var, Fond mənim pulumu 7-8%-lə banka yerləşdirib ildə ən azı 2000-2500 manat pul qazanır. Bəs mənə bu vəsaitdən niyə pay vermir?!”
Vasif
