Təəssüf ki, zaman-zaman intihar xəbərlərində müəyyən artımlar müşahidə olunur. Kimisi öz seçimi, kimisi isə təzyiqlər, təhdidlər və ya başqa səbəblərdən bu yola əl atırlar. İntihara sürüklənənlərin adətən haqsızlıqla qarşılaşdıqlarına, yaxud psixoloji faktorlara görə faciəvi sonları olur.

Maraqlıdır, qanunvericiliklə şəxsi intihar həddinə çatdıranları hansı cəzalar gözləyir?

Mövzu ilə bağlı Sfera.az-a açıqlama verən vəkil Turan Abdullazadə bildirib ki, bu barədə Cinayət Məcəlləsinin özünü öldürmə həddinə çatdırma maddəsi var:

“Məcəllənin 125-ci maddəsinə əsasən, təqsirkardan maddi, xidməti və ya sair cəhətdən asılı olmuş zərərçəkmiş şəxsi onunla amansız rəftar etmə, onun ləyaqətini mütəmadi olaraq alçaltma, ona hədə-qorxu gəlmə yolu ilə özünü öldürmə və ya özünü öldürməyə cəhd həddinə çatdırma—üç ildən yeddi ilədək müddətə azadlıqdan məhrum etmə ilə cəzalandırılır”.

Vəkil qeyd edib ki, bu cür cinayətlərə görə təqsirləndirilən şəxs qismində cəlb etmə prosesi olduqca mürəkkəbdir:

“Bir çox hallarda bu cinayət işləri üzrə məsuliyyətə cəlb etmək üçün yetərli mötəbər dəlillər olmur və ya dəlillər olsa da, məsuliyyətə cəlb etmək üçün kifayət etmir”.

T.Abdullazadənin sözlərinə görə, özünü öldürən şəxsə qarşı hədə, amansız rəftar kimi hərəkətlər real olmalıdır:

“Bunları təsdiq edən yetərli sübutlar yoxdursa, bu cinayət işləri üzrə icraata bir çox hallarda xitam verilir”.

Firuzə Əliyeva