Macarıstanın Baş naziri Viktor Orban Avropa İttifaqının (Aİ) Kiyevə yardım paketi barədə danışıb.

Sfera.az xarici KİV-ə istinadən xəbər verir ki, o, 50 milyard avroluq paketin Ukrayna ordusuna yönləndirilməsinə ehtiyac olmadığını deyib. Orban sözügedən yardımın ölkə iqtisadiyyatını dəstəkləmək üçün lazım olduğunu dilə gətirib.

“Haqqında danışdığımız bu 50 milyard avro orduya yönəlməyəcək, əksinə, müflis olan Ukrayna dövlətinin dağılmamasını təmin edəcək. Rəsmi Kiyev iqtisadiyyat baxımından çöküb”, - deyə baş nazir izah edib.

O əlavə edib ki, maddi yardım olmadan ukraynalılar pensiya və digər ödənişləri ala bilməyəcək.

Bundan əvvəl Avropa Şurasının rəhbəri Şarl Mişel Aİ-nin Ukraynaya 2027-ci ilə qədər 50 milyard avro dəyərində uzunmüddətli büdcə yardımı proqramını təsdiqlədiyini açıqlamışdı. O bildirib ki, bu qərar assosiasiyada iştirak edən 27 ölkənin hamısı tərəfindən dəstəklənib. Ağ Evin Strateji Kommunikasiyalar üzrə koordinatoru Con Kirbi isə Aİ tərəfindən verilən yardım paketinin ABŞ-nin Kiyevə dəstəyini əvəz edə bilməyəcəyini söyləyib. 

Əzizə Zeynal