Son günlər erməni mediasında Nikol Paşinyanın “kreslo”sundan endiriləcəyi ilə bağlı məlumatlar yayılır. Qeyd olunur ki, onu, Ermənistanın Təhlükəsizlik Şurasının katibi Armen Qriqoryan əvəz edə bilər və bu şəxs məhz Qərb tərəfindən seçilib. Digər tərəfdən, qatı anti-Rusiyaçı kimi tanınan Armen Qriqoryan demək olar, hər ay ABŞ-yə səfər edən yeganə Ermənistan rəsmisidir.

Qərbin tezliklə Paşinyanı başqası ilə əvəz etmək fikri varmı?

Bununla bağlı Sfera.az-a açıqlama verən politoloq Məhəmməd Əsədullazadə Ermənistan hakimiyyəti daxilində fikir ayrılıqlarının formalaşdığını deyib:

“Xüsusilə, Armen Qriqoryanın ABŞ-yə, Avropa ölkələrinə rəsmi səfərləri, Qərb diplomatları ilə görüşləri hakim “Mülki Müqavilə” partiyası tərəfindən narahatlıqla qarşılanır. Hesab edirəm ki, Qərb alternativ kimi Qriqoryana da dəstək verə bilər. Nikol Paşinyan dəyişkən siyasətçidir, istənilən zaman onun, Qərblə əlaqələri yenidən dayandırıb Rusiya ilə strateji müttəfiqliyi davam etdirməsi mümkündür. Qərbdə də bunu görürlər və düşünürlər ki, Ermənistanla danışıqlar aparmaq üçün Armen Qriqoryan daha etibarlı fiqurdur”.

Müsahibimiz bildirib ki, hakim “Mülki Müqavilə” partiyasının bəzi üzvləri məsələ ilə bağlı iki yerə parçalanıb:

“Bir qrup Qriqoryanı, bir qrup isə Paşinyanı dəstəkləyir. Bu təbii ki, partiya daxilində gedən müzakirələrdir. Amma göründüyü kimi, bu məsələ ictimai xarakter daşıyır və erməni mətbuatının da gündəmi olub. Deməli, artıq narazılıqlar baş qaldırır. Paşinyan Qriqoryanı rəqib görərsə, dərhal onu zərərsizləşdirilməsinə başlayacaq. Görünür, Qərb tərəfindən Armenə ciddi dəstək var və ona qarşı bu cür təzyiqlərin olduğunun şahidi oluruq. Düşünürəm ki, növbəti parlament seçkilərində Qərb Paşinyana deyil, Qriqoryana dəstək verə bilər”.

Günay