İpoteka kreditləri daha çox kimlərə verilir?: Evlilər, kişilər...

Azərbaycanda dövlət vəsaiti hesabına verilən ipoteka kreditlərini daha çox hərbçilər və maliyyə qurumlarında (bank, sığorta və s.) çalışan şəxslər alır. 

Sfera.az İpoteka və Kredit Zəmanət Fondunun son məlumatlarına istinadən xəbər verir ki, ayrılan kreditlərin 19 faizi hərçilərə, 18,4 faizi maliyyə qurumlarında çalışan şəxslərə verilib. 

Bu sahələrdə çalışanlarla bərabər energetika (neft, qaz, elektrik enerjisi sahələri) və hüquq-mühafizə orqanlarında (polis, penitensiar xidmət, gömrük, miqrasiya sahələri) işləyənlərə də çox kredit ayrılıb. Cəmi kreditlərin 10 faizi energetiklərə, daha 10 faizi isə hüquq-mühafizə orqanlarının əməkdaşlarına verilib. Ən az ipoteka kreditlərini isə fərdi sahibkarlar, kommersiya fəaliyyətinin digər bölmələri ilə məşğul olan şəxslər alıb.

Aylıq gəlirlərinə görə fərqləndirildikdə daha çox krediti gəliri 1100 manatdan çox olan şəxslər əldə edib. Bağlanan kredit müqavilələrin 65 faizi aylıq gəliri 1100 manatı ötən şəxslərlə imzalanıb. 

Dövlət vəsaiti hesabına ipoteka krediti alanların digər fərqləndirici göstəricilərinə diqqət yetirdikdə görürük ki, kreditləri əsasən evli olanlara (kredit götürənlərin 68 faizi), kişilərə (kredit müqavilələrinin 79 faizi) və orta yaşlı şəxslərə (kredit müqavilələrinin 66,5 faizi) verirlər. 

Vasif