Türklərin partiyası Avropada seçkilərə QATILACAQ: “Qazanma şansları yüksəkdir”

Almaniyada yaşayan türklər tərəfindən yaradılan DAVA (Demokratische Allianz für Vielfalt und Aufbruch - Müxtəliflik və Oyanış üçün Demokratik Alyansı) partiyası qarşıdan gələn Avropa Parlamentinə seçkilərdə iştirak etmək istəyir.

Sfera.az xəbər verir ki, bu barədə Almaniyanın “Bild” qəzeti yazı dərc edib. Qəzetin şərhinə görə, yeni partiya Türkiyənin hakim partiyası ilə əməkdaşlıq edir və siyasi fəaliyyətində Ankaranın maraqlarını müdafiə edir. 

DAVA  Avropadakı seçkilərdə 2,5 milyon səs toplamaq potensialına sahibdir. “Bild” təxmin edir ki, partiya bu qədər səs toplayarsa, Avropa Parlamentinə daxil olacaq. Gələcəkdə bu partiyanın seçici auditoriyası bir qədər də genişlənə bilər. Çünki Almaniyada vətəndaşlıq qanununun dəyişdirilməsi gözlənilir.

2024-cü ilin aprelində yeni qanun qəbul edilərsə, seçki hüququna malik daha 2,5 milyon müsəlman Almaniya vətəndaşlığını alacaq. Bu halda, DAVA böyük elektorat qazanacaq və onu dəstəkləyənlərin sayı 5 milyona çatacaq. 

Qeyd edək ki, Avropa Parlamentinə seçkilərdə seçim həddi yoxdur və hər bir partiya topladığı səsə uyğun millət vəkili yeri qazanır. Buna görə də DAVA-nın Avropa Parlamentində namizədlərinin seçiləcəyi ehtimalı yüksəkdir.

Vasif