Yaşımız artdıqca, həyatımız müxtəlif istiqamətlərdə dəyişməyə başlayır. Ehtiyacımız olan vitamin və minerallar da dəyişir. 40 yaşdan sonra insanların vitamin ehtiyacları daha da artır.

Bəs 40 yaşdan sonra insan orqanizmi üçün hansı vitaminlər önəmlidir?

Mövzu ilə bağlı Sfera.az-a danışan həkim dietoloq Vüsalə Tağıyeva bildirib ki, bir sıra vitaminlər xəstəliklərin qarşısının alınmasında böyük rol oynayır.

“Kalsium, əzələlər, sinir hüceyrələrinin və damarların düzgün işləməsi üçün lazımdır. 40 yaşdan sonra orqanizmin kalsiumu mənimsəmə qabiliyyəti azalır. Yetəri qədər kalsium qəbul edilməzsə orqanizm həmin vitamini sümüklərdən almağa başlayır. Bu da, insanlarda, xüsusən qadınlarda sümük əriməsinə gətirib çıxardır. Süd və balıq məhsulları, badam, fıstıq, sardinya yağı kalsiumla zəngindir. D vitamini də sümüklərin sağlamlığı üçün önəmlidir. 50 yaşdan yuxarı insanlar 800-1000 mq D vitamini qəbul etməlidirlər. Süd, qızıl balıq, yumurta D vitamini ilə zəngin qidalardır”.

Dietoloqun sözlərinə görə, B12 vitamini qanın sinir hüceyrələrinin əmələ gəlməsində önəmli rol oynayır:

“B12 çatışmazlığı xroniki yorğunluq yaradır. Gün ərzində insanlar 2,4 mikroqram B12 vitamini qəbul etməlidirlər. Maqnezium isə qanda şəkərin miqdarını tənzimləyir və təzyiqi stabil saxlayır. Yetərli miqdarda maqnezium qəbul etməsək ürək ritmi pozulur və sümüklər həssaslaşır. Balqabaq toxumu, badam və ispanaq maqnezium qaynağıdır. 40 yaşdan sonra sağlam və balanslı qidalanma ilə insan orqanizmini vitaminlərlə təmin etmək mümkündür”.

Ülkər Abdurahmanlı