Rusiyalı siyasətçi Boris Nadejdin özünün Telegram kanalında bildirib ki, prezident seçkilərində namizədliyini irəli sürmək üçün Rusiyada 200 minə yaxın imza toplayıb.

Sfera.az Rusiya mediasına istinadən xəbər verir ki, siyasətçi qeyd edib ki, səslərdən 105 mini seçilərək Mərkəzi Seçki Komissiyasına təhvil veriləcək. O, xaricdə toplanan imzaların Rusiyaya çatdırılacağını və qərargahı tərəfindən hesablanacağını əlavə edib, həmçinin onun namizədliyini dəstəkləyən hər kəsə təşəkkür edib.

Nadejdin RİA Novosti-yə açıqlama verib ki, imzalar yanvarın 31-i saat 10:00-da MSK-ya veriləcək.

Xatırladaq ki, bundan daha əvvəl Kremlin sözçüsü Dmitri Peskov Boris Nadejdini prezident seçkilərində hazırkı dövlət başçısı Vladimir Putinə rəqib hesab etmədiklərini bildirib.

Qeyd edək ki, Rusiyada prezident seçkiləri martın 17-də baş tutacaq.

Əzizə Zeynal