Avropa ölkələrinə viza almaq çətinləşəcək? “Ola bilər ki...\"

Avropa Şurası Parlament Assambleyasının (AŞPA) Azərbaycan nümayəndə heyətinin etimadnaməsini ratifikasiya etməmək barədə qərar qəbul etməsi hələ də müzakirə obyektidir. Sözügedən qərarın müəyyən təsirlərinin olacağı bildirilir. Bunlardan biri də viza almaqla bağlıdır.

Belə ki, AŞPA ilə əməkdaşlıq dayandırıldıqdan sonra Avropa ölkələrinə viza almağın çətinləşəcəyi istiqamətində fikirlər var. Qeyd olunur ki, səbəb Avropa ilə münasibətlərin pisləşməsidir, bu da, xüsusilə həmin ölkələrdə yaşamaq və işləmək istəyənlər üçün problemlər yaradacaq.

AŞPA ilə əməkdaşlığın dayandırılması viza məsələlərinə hansısa formada təsir edə bilərmi?

Bununla bağlı Sfera.az-a açıqlama verən iqtisadçı-ekspert Natiq Cəfərli deyib ki, AŞPA ilə münasibətlərin müvəqqəti gərginləşməsinin viza məsələsinə heç bir aidiyyatı yoxdur:

“Rusiya və Belarus AŞPA-dan ümumiyyətlə qovulublar. Amma onların vətəndaşları hələ bu gün də bütün gərginliklərə baxmayaraq, viza alırlar. Hətta başqa ölkələrdən belə gəlib viza ala bilirlər. Ona görə də AŞPA ilə əməkdaşlığın dayandırılmasının hər hansı təsirinin olacağını düşünmürəm”.

Müsahibimiz xatırladıb ki, Azərbaycan Avropa Birliyi ilə vizaların sadələşdirilməsi istiqamətində danışıqlar aparır: “Ola bilər ki, bu danışıqlarda müəyyən axsamalar olsun. Yəni proses uzana bilər. Amma vizaların verilməsi ilə bağlı hansısa çətinliklər olmayacaq”.

Günay