"Ukrayna artıq ABŞ-dən pul almayacaq, çünki ABŞ Prezidenti Co Baydenin administrasiyası ölkənin daxili problemlərini həll edə bilmir".

Sfera.az xəbər verir ki, bunu "Welt"ə müsahibəsində ABŞ Konqresinin Nümayəndələr Palatasının üzvü Çip Roy deyib.

“Co Bayden administrasiyası qaçqın axınının qarşısını almaq və ABŞ sərhədini qorumaq üçün hər şeyi etməyənə qədər, Kiyevə bir dollar da verilməyəcək”, - konqresmen bildirib.

Roy əlavə edib ki, sərhəd təhlükəsizliyi məsələsi ABŞ üçün prioritet olmalıdır və yalnız bundan sonra beynəlxalq məsələlərə diqqət yetirilməlidir. Onun fikrincə, bir çox amerikalı Ukraynaya dəstəkdən hiddətlənir və yardımın məqsədini başa düşmür.

Konnektikut ştatını təmsil edən senator Kris Merfi isə bir müddət əvvəl bildirmişdi ki, ABŞ Konqresinə əlavə maliyyənin, o cümlədən Ukraynaya yardımın təsdiqlənməsi üçün daha çox vaxt lazım ola bilər.

Xatırladaq ki, ötən il dekabrın 27-də Pentaqon Ukrayna üçün 250 milyon dollarlıq yeni təhlükəsizlik yardım paketi elan edib ki, bu paketə yer-hava raket sistemləri, artilleriya mərmiləri və daha çox hava hücumundan müdafiə komponentləri üçün əlavə sursatlar daxildir. Pentaqonun Ukraynaya hərbi yardım göstərmək üçün hələ də 4 milyard dollar vəsaiti var, lakin ABŞ ordusunun ehtiyatlarını artırmaq üçün heç bir vəsait yoxdur.

Əzizə Zeynal