İrəvanın MÜƏMMALI ADDIMLARI: “Bu saziş region üçün təhlükə yaradır” 

Ötən günlərdə Ermənistan və Qazaxıstan Müdafiə Nazirlikləri arasında əməkdaşlıq planı imzalanıb. Bu, hər iki ölkədə bir sıra tədbirlərin keçirilməsini nəzərdə tutur.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Astananın İrəvanla hərbi əməkdaşlığının region üçün müəyyən riski var:

“Həmçinin bu, Azərbaycan-Qazaxıstan münasibətlərində müəyyən dərəcədə suallara gətirib çıxara bilər. Düzdür, Qarabağ münaqişəsi həll edilib, amma Ermənistanla sülh müqaviləsi hələ bağlanmayıb. Astana münaqişə həll edildiyinə görə, Ermənistanla hərbi əməkdaşlıqda problem görməyə bilər. Lakin regionda situasiyanın dəyişmə ehtimalı da nəzərə alınmalıdır. Rəsmi Bakı Astanaya bununla bağlı öz mövqeyini çatdırmalıdır”.

Ekspert bildirib ki, Qazaxıstanın Ermənistanla hərbi əməkdaşlığına ehtiyac yoxdur:

Sadəcə Ermənistan Azərbaycanın müttəfiqləri ilə əlaqələrini inkişaf etdirməyə çalışır. İki ölkə arasında sülh müqaviləsinin imzalanmadığını nəzərə alaraq, Azərbaycan Qazaxıstana diplomatik nəzakətlə öz mövqeyini çatdırmalıdır. Burada Qazaxıstanın deyil, Ermənistanın qazancı aydın görünür”.

Günay