Əfsanəvi “Boney M” qrupunun yaradıcısı vəfat etdi
Alman musiqiçi və əfsanəvi "Boney M" qrupunun yaradıcısı Frank Farian 82 yaşında vəfat edib.
Sfera.az xəbər verir ki, bu barədə musiqiçinin ailəsi məlumat verib.
Sənətçinin yaxınlarının verdiyi məlumata görə, o, uzun müddət yaşadığı ABŞ-ın Florida ştatındakı Mayamidəki evində dünyasını dəyişib. Ölümün səbəbi açıqlanmasa da, onun 2022-ci ildə ürəyindən əməliyyat olunduğu və bu müddətdə ürək qapağının dəyişdirildiyi məlum olub.
2024-cü ilin yayında məşhur sənətçinin 83 yaşı tamam olacaqdı.
Frank Farian 1941-ci ildə Almaniyanın cənub-qərbində Kirn şəhərində anadan olub. Yetkinlik yaşına çatanda o, musiqi karyerasını davam etdirməklə bərabər, aşpaz kimi təhsil almağa başlayıb. Daha sonra əvvəlcə müğənni, sonra prodüser kimi fəaliyyət göstərib.
1976-cı ildə məhz onun səyləri sayəsində “Boney M” qrupu meydana çıxdı və “Daddy Cool”, “Rasputin”, “Mary's Boy Child” kimi bir sıra dünyaca məşhur hitlər buraxdı.
Frank Farian, həmçinin Meat Loaf və Stevie Wonder kimi sənətçilərlə işləmişdir ki, bu da onlara əlavə populyarlıq gətirmişdir. Bəzi məlumatlara görə, prodüser dünya üzrə 800 milyona yaxın rekord satışa sahibdir.
Xatırladaq ki, ötən gün “Beverli Hills” serialının ulduzu Devid Qeylin 58 yaşında dünyasını dəyişdiyi barədə məlumat yayılmışdı. Məşhur serialda aktyor Brenda Uolşun nişanlısı Stüart rolunu oynayıb. O, həmçinin "Savannah", "ER" və "Robin Hoods" seriallarında çəkilib.
Aynil
Sfera.az
