Almaniya vətəndaşlığı olmayan əcnəbiləri orduya qəbul etməyi planlaşdırır.

Sfera.az bildirir ki, ölkənin müdafiə naziri Boris Pistorius bu təcrübəni müdafiə etsə də, ekspertlər narahatlığını ifadə edib. Sözügedən planla bağlı səbəb kimi orduda kadr çatışmazlığı irəli sürülüb.

Alman mətbuatında yer alan xəbərlərə görə, hazırda orduda təxminən 180 min kişi və qadın xidmət edir. Bu rəqəmin 2031-ci ilə qədər 203 minə çatdırılması hədəflənir:

“Lakin əhalinin qocalması və iş qüvvəsinin azalmasına görə, bu ilki 20 min əsgər çatışmazlığı belə təmin oluna bilmir”.

Qeyd olunur ki, ölkədə bir neçə siyasi partiyalar təklifə müsbət yanaşır və orduya çağırılacaq əcnəbilərin Avropadan seçilməli olduğunu vurğulayırlar. Almaniyanın “Bild” nəşrinin məlumatına görə, Belçika hərbi yaşda olan bütün Avropa İttifaqı (Aİ) vətəndaşlarına orduya qoşulmağa icazə verir. Danimarka Aİ vətəndaşlarını öz dillərində danışmaq şərti ilə hərbi xidmətə qəbul edir. İrlandiya isə beş ildən artıq ölkədə yaşayan digər ölkə vətəndaşlarını belə öz ordusuna qəbul edir.

Xatırladaq ki, Almaniyanın müdafiə naziri Boris Pistorius bu yaxınlarda “Tagesspiegel” qəzetinə müsahibəsində orduda kadr çatışmazlığının aradan qaldırılması üçün tədbirlər görüldüyünü və əcnəbilərin cəlb edilməsi təklifinin diqqətlə araşdırıldığını deyib.

Günay