Qohum evlilikləri ilə bağlı FAKTLAR: "Ölü doğulma, ürək qüsuru..." - AÇIQLAMA

Bəzi insanlar ailə bağlarının qorunması üçün qohum evliliyini vacib hesab edirlər. Belə evlilikdən doğulan uşaqların bir çoxunda eyni geni daşıdıqları üçün sağlamlıq problemləri olur. Lakin bəzi insanlar bu cür məsələləri düşünmədən ailə həyatı qururlar.

Bəs qohum evliliklərinin fəsadları nədir?

Mövzu ilə bağlı Sfera.az-a danışan həkim Natavan Nəbiyeva bildirib ki, hər bir insan 5-dən 8-ə qədər genetik xəstəliyin daşıyıcısıdır. “Qohum evliliyi edənlərin genetik cəhətdən xəstə uşaq dünyaya gətirmə ehtimalları 9 faiz daha çoxdur. Əmi uşaqlarının evliliyi birinci dərəcəli, nəvə evlilikləri isə ikinci dərəcəli evlilik sayılır. Genetik problemlər həm atadan həm də anadan ötürülə bilir. Buna görə də cütlüklər evliliyin əvvəlində və hamiləliyin ilk aylarında genetik analizlər verməlidirlər. Həmin analizlərə əsasən cütlüklərin evliliyə uyğun olub-olmadığı müəyyənləşdirilir”.

Həkim bildirib ki, qohum evliliyi edən cütlüklərin bir çoxu genetik xəstəliklərə önəm vermirlər. “Azərbaycanda 10-dan çox irsi xəstəlik mövcuddur. Bu xəstəliklərlə doğulan uşaqların sayı ildən-ilə artır. Uşaqların ana bətnində ölməsi, hamiləliyin erkən bitməsi, ölü doğulma, ürək qüsuru, uşaqların aşağı çəki ilə dünyaya gəlməsi faktlarına ən çox qohum nikahlarda rast gəlinir”.

Ülkər Abdurahmanlı