İsrail XİN rəhbərinin fələstinlilərlə bağlı bu təklifi Aİ-ni QARIŞDIRDI

İsrailin xarici işlər naziri İsrael Katz Avropa İttifaqının (Aİ) xarici işlər nazirlərini qapalı iclasda qəzəbləndirib.

Sfera.az "The New York Times"a istinadən xəbər verir ki, danışıqlar zamanı İ.Katz yük və sərnişinləri yoxlamaq üçün Qəzza zolağının yaxınlığında süni ada yaratmaq təklifinin 2017-ci il videosunu nümayiş etdirib. Bundan əlavə, plan fələstinlilərin adaya hipotetik köçürülməsini nəzərdə tutub. 

Bu bəyanat Avropa nümayəndələrinin qarışıq reaksiyasına səbəb olub. Xüsusilə, Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Cozef Borrell açıq şəkildə bəyan edib ki, “bunun (ada yaradılması) müzakirə mövzusu ilə xüsusi əlaqəsi yoxdur” və əlavə edib ki, avropalıların fikrincə, “İsrailin təhlükəsizliyini və qonşuları ilə yanaşı həyatını təmin edəcək və Fələstin dövlətinin yaradılmasını təmin edəcək davamlı sülh lazımdır".

Bundan başqa, İsrail XİN rəhbərinin hərəkətləri Təl-Əvivin özündə də qarışıq reaksiya ilə qarşılanıb. Adının çəkilməsini istəməyən İsrail rəsmilərindən biri Katzın təklifinin hökumət siyasəti olmadığını bildirib.

Bundan əvvəl İsrailin Mossad kəşfiyyat xidmətinin rəhbəri David Barnea Fələstinin radikal HƏMAS hərəkatının liderlərini Qəzza zolağından çıxmağa dəvət edib . Təklif daha geniş atəşkəs danışıqları kontekstində irəli sürülüb.

Əzizə Zeynal