Elektrik sayğacları bu halda təhlükəlidir: "Yanğına gətirib çıxarır..." - FOTO

Qırılmış, zədələnmiş, qutusunun qapağı açıq olan elektrik sayğacları...Demək olar ki, əksər həyət evlərində nisbətən kənarda yerləşdirilən sayğaclar bu vəziyyətdədir. Ya vətəndaşlar məsuliyyətsiz və ya səhlənkardır, ya da aidiyyatı qurum buna vaxtında nəzarət etmir.

Elektrik sayğacları hansı təhlükələr yarada bilər? Vətəndaşlar sayğaclarla bağlı nələrə diqqət etməlidir?

Bununla bağlı Sfera.az-a açıqlama verən təhlükəsizlik məsələləri üzrə ekspert Elmar Nurəliyev deyib ki, elektrik sayğacları onlar üçün nəzərdə tutulan qutularda və örtülü şəkildə olmalıdır: “Məişət abonenti elektrik şəbəkəsinin, sayğacın təhlükəsiz istismarına cavabdehdir. İstehlakçının təqsiri üzündən hər hansısa bir nasazlıq yaranarsa, sayğac sıradan çıxarsa, işlək funksiyaları pozularsa, onun təmir olunması şəxsin hesabına edilir. Zərərə düşməmək üçün sayğacların bağlı saxlanılması təmin olunmalıdır. Təbii ki, sayğaclar quraşdırılanda yerləşdirildiyi qutuların açarı da vətəndaşa verilir. Qutu və ya sayğac sıradan çıxarsa, yenidən əvəz etmək lazımdır”.

Müsahibimiz deyib ki, sayğacların yerləşdiyi qutuların açıq olması müəyyən problemlərə səbəb ola bilər: “Məsələn, əlverişsiz hava şəraitində - küləyin, yağışın, qarın təsirindən içəriyə yad cisim düşə, qısaqapanma yarana bilər. Bunun isə yanğına gətirib çıxarması mümkündür. O cümlədən azyaşlılar, yoldan keçən şəxslər də bilməyərəkdən açıq vəziyyətdə qalan sayğaclara toxuna, onları elektrik cərəyanı vura bilər. Yaxşı olar ki, vətəndaşlar həm əlavə xərcə düşməmək, həm də təhlükəsizlik baxımından elektrik sayğaclarının qutularda yerləşməsini, ağzının qapalı olmasını təmin etsinlər”.

Günay