Çirkli pulların yuyulmasında ittiham olunan bloqqer istintaq təcridxanasına göndərildi - FOTOLAR
Rusiya Federasiyasının Moskva üzrə İstintaq Komitəsi bloqqer Yelena Blinovskayanın həbsə alınması üçün Zamoskvoretski rayon məhkəməsinə göndərdiyi vəsatət təmin olunub. Blinovskaya 2024-cü il aprelin 24-dək istintaq təcridxanasında qalacaq.
Sfera.az bildirir ki, Rusiyalı bloqqer bir milyard rubldan çox vergi ödəməkdən yayınmaqda və çirkli pulların yuyulmasında ittiham olunur. O, həmçinin ev dustaqlığı qaydalarını pozmaqda, iş üzrə şahidlə ünsiyyətdə və evində yeni il şənliyi keçirməkdə ittiham olunub.
İstintaq Komitəsinin mətbuat xidməti onu da bildirib ki, Blinovskaya ödəniş vasitələrinin qanunsuz dövriyyəsi maddəsi ilə (CM-nin 187-ci maddəsinin 1-ci hissəsi) ittiham olunub.
Məhkəmə prosesi bu gün baş tutub. İş üzrə şahid Blinovskayanın şirkətlərindən birinin baş direktoru Viktoriya Asmolova olub. O da yeni il şənliyində iştirak edib.
Müstəntiq bildirib ki, Blinovskaya hazırda Cinayət Məcəlləsinin 187-ci maddəsi ilə ittiham olunur ki, bu da sahibkarların istintaq təcridxanasına göndərilməsinə qadağaya şamil edilmir.
Yelena Blinovskaya kimdir?
Yelena Blinovskaya məşhur rusiyalı bloqqer, teleaparıcı, psixologiya və şəxsi inkişaf üzrə məşhur (“istək marafonları”) kursların təşkilatçısıdır. İstintaq Komitəsi iddia edir ki, bloqqer büdcəyə 918 milyon rubldan çox vergi ödəməyib və cinayət yolu ilə əldə etdiyi 43 milyon rublu leqallaşdırıb.
Blinovskaya 2023-cü ilin aprelində Rusiyanı tərk edərək Belarusa, oradan isə Özbəkistana getmək istəyərkən saxlanılıb. Federal Vergi Xidməti bloqqerin cərimələri az ödədiyini üzə çıxarıb ki, bu da borcun ümumi məbləğinin 1,4 milyard rubla qədər artmasına səbəb olub.
2023-cü ilin sonunda Rusiya mətbuatı Blinovskayanın bütün borcunu ödədiyini yazıb. Lakin vəkili Nataliya Salnikova bunu təkzib edərək, onun 64 milyard rubl dəyərində aktivinə həbs qoyulduğunu deyib. Daha sonra bloqqerin 55 milyon rubl vergi ödədiyi bildirilib.
Blinovskayanın özü özünü “motivasiyalı natiq” adlandırır. O, 2015-ci ildə insanların “istək kartları” hazırladığı marafonlarını satmağa başlayıb. O, hətta Sankt-Peterburq meriyasının təsis etdiyi TV-3 kanalında şou müəllifi və aparıcısı olub. Blinovskaya dövlətdən də başda Kino Fondu haqqında bir film üçün 25 milyon rubl olmaqla, pul vəsaiti alıb.
Blinovskaya evlidir, 4 uşaq anasıdır.
Qeyd edək ki, Yelena Blinovskaya məhkəmənin 28 aprel 2023-cü il tarixli qərarı ilə ev dustaqlığındadır.
Aysel
Sfera.az
