“Falçılar vergiyə cəlb olunmalıdır!” – AÇIQLAMA
Son zamanlar sosial media vasitəsilə fala baxanların sayında artım müşahidə olunur. Təəssüf ki, paralel olaraq bəzi vətəndaşlar da qurbana çevrilirlər. Falçılar xidmətlərinin qarşılığını müştərilərə qabaqcadan verilən bank hesablarına edilən ödəmələrlə alırlar.
Lakin bir çoxları göstərilən xidmətdən narazılıq edir, ödənişlərin geri qaytarılmasını tələb edir, nəticədə itirən tərəf olurlar.
Bununla bağlı Sfera.az-a danışan Azad İstehlakçılar Birliyinin sədri Eyyub Hüseynov deyib ki, dünyanın bir çox ölkələrində fala baxanlar kifayət qədərdir:
“Kanada kimi inkişaf etmiş ölkələrdə belə dəfələrlə özüm fala baxanları görmüşəm. Dövlətin bu vəziyyətdə əsas işi onları vergiyə cəlb etməkdir. Bir çox ölkələrdə heç düşünülmür ki, istehlakçılar aldadılır, pullar hara gedir və.s. Dövlətə əsas onların vergiyə cəlb olunmaları lazımdır. Necə deyərlər, kimin kimi aldatması önəmli deyil. Təəssüf ki, Azərbaycanda da vəziyyət belədir. Əlbəttə, bu, normal hal deyil”.
Sədr qeyd edib ki, bu istiqamətdə əhali maarifləndirilmir: “Təəssüf ki, Azad İstehlakçılar Birliyinin də bununla bağlı böyük günahı var. Biz də əhalini belə məsələlərdən çəkindirmirik. Falçılarla bağlı bizə yazılı şikayətlər daxil olmayıb. İldə bir-iki dəfə telefon zəngləri olur - "Necə hərəkət edək?" və.s. soruşurlar. Falçı hüquqi şəxsdirsə, vətəndaş ona pul ödəyibsə, buna da istehlakçı hüquqlarının pozulması kimi baxıla bilər. İstehlakçılar bu cür şikayətlərlə müraciət edərsə, əlbəttə, onların hüquqlarını qorumağa hazırıq”.
Günay
