Azərbaycan və Ermənistan arasında Zəngəzur məsələsi sülhün əsas problemi olaraq qalır.

Sfera.az xəbər verir ki, bu barədə fikirləri politoloq Məhəmməd Əsədullazadə bildirib.

Onun sözlərinə görə, Azərbaycan və Ermənistan arasında danışıqlarda Zəngəzurdan maneəsiz giriş-çıxışla bağlı məsələ sülh müqaviləsinin bağlanmasını bir müddət təxirə sala bilər:

“Ermənistan rəhbərliyi Azərbaycanın şərtini qəbul edərsə, may ayından gec olmayaraq sülh müqaviləsi bağlana bilər. ABŞ-də Azərbaycana qarşı müxtəlif istiqamətlərdə təzyiq etməklə sülh müqaviləsinin məhz öz vasitəçiliyi ilə bağlanmasında maraqlıdır. Prezident İlham Əliyev yerli televiziyalara verdiyi açıqlamada məhz Zəngəzur yolunun maneəsiz giriş-çıxışının sülhün əsas şərti olduğunu vurğulayıb. Zəngəzur dəhlizindən maneəsiz giriş-çıxış olmayacaqsa, Azərbaycan və Ermənistan arasında sülhün əhəmiyyəti yoxdur”.

Politoloq bildirib ki, Azərbaycanla Ermənistan arasında fundamental məsələlər o qədər dərindir ki, geosiyasi problemin bir hissəsinə çevrilib. “Əgər, Yerevan iki dövlət arasında problemi geosiyasi müstəvidə davam etdirib, bununla Azərbaycana təzyiq edəcəyini hesab edirsə, sülh müqaviləsinin bağlanması baş tutmayacaq”.

Ülkər Abdurahmanlı