Son günlər daşınmaz əmlakların notarial alqı-satqısında 20 min manatdan artıq məbləğ üçün gəlir deklarasiyası tələb olunduğu barədə məlumatlar yayılıb. Bildirilir ki, bəzi vətəndaşlardan əmlak alışı üçün ödənilən pulun rəsmi mənbəyinin göstərilməsi tələb olunur. Məlumata görə, alıcılar gəlir deklarasiyası təqdim edə bilmədikləri üçün notariusdan geri qayıtmalı olurlar.

Bununla bağlı Sfera.az-a açıqlama verən əmlak məsələləri üzrə ekspert Elnur Fərzəliyev sözügedən iddiaların yanlış olduğunu, insanların düzgün məlumatlanmadığını deyib:

“İstənilən böyük pul əməliyyatlarının aparılması zamanı – istəyir bank sektoru, istəyir daşınmaz əmlakların alqı-satqısı zamanı mənbə soruşulur. Yəni deklarasiya tələbi yoxdur, amma vətəndaş pulu haradan əldə etdiyini deməlidir. Buna aid müvafiq qanunvericilik aktları var. Məsələn, şəxs “evimi satıb almışam”, “kənd təsərrüfatı ilə məşğulam”, “xarici ölkədə biznesim var” və.s tipli hansısa formada şifahi məlumat verməlidir”.

Müsahibimiz bildirib ki, insanların çoxu şifahi məlumat verməkdən belə ehtiyat edir, alqı-satqıları ertələyirlər:

“Burada təhlükəli bir şey yoxdur.  Eyni proses digər xidmətlərdə də aparılır. Həmçinin, notariuslar həmin kateqoriyaya daxil olduğuna görə, vətəndaş külli miqdarda vəsaitlə alqı-satqı etdikdə bu cür məlumatlandırma əldə edir. Qorxulu bir şey yoxdur, sadəcə vətəndaş pulu necə əldə etməsi ilə bağlı kiçik informasiya verməlidir ki, onlar da öz qeydlərini apara bilsinlər”.

Günay