"Sürücü həmin qurumu məhkəməyə verə bilər, çünki..." - Vəkildən zərər görmüş avtomobillərlə bağlı AÇIQLAMA

Bəzən sürücülər yolda müəyyən maneələrlə qarşılaşırlar. Məsələn, hərəkət edərkən qəflətən yola tökülmüş müxtəlif tərkibli mayelər, maddələr onlara problem yaradır. Nəticədə avtomobil sürüşə və yaxud qəza baş verə bilir. Bununla da avtomobilə, o cümlədən sürücüyə maddi zərər dəyir.

Maraqlıdır, bunun əvəzini sürücü kimdən tələb edə bilər?

Bununla bağlı Sfera.az-a açıqlama verən vəkil Vamiq Şükürov deyib ki, ümumiyyətlə, maye və maddələrin töküldüyü yolda işarələr qoyulmalı, lazım gəldikdə isə hərəkət məhdudlaşdırılmalıdır:

“Yol təsərrüfatını idarə etməli olan qurumun vaxtında bu tədbirləri görməməsi nəticəsində avtomobilə zərər dəyərsə, onda sürücü həmin qurumu məhkəməyə verə, ziyanın əvəzini ondan tələb edə bilər”.

Vəkil həmçinin söyləyib ki, həmin maye və maddələrin yola tökülməsinə səbəb olan sürücülərdən də ziyanın əvəzi tələb oluna bilər.

Günay