"Bu, Aİ-nin ABŞ-dən ayrılmasına və NATO-nun süqutuna səbəb olacaq" - AÇIQLAMA
NATO Ukraynanın tələbi ilə təcili iclas keçirəcək. İclasda əsas müzakirə mövzularından biri Ukraynanın hava hücumundan müdafiəsinin gücləndirilməsi olacaq.
Bununla bağlı Sfera.az-a açıqlama verən politoloq Məhəmməd Əsədullazadə deyib ki, sözügedən təcili iclasa səbəb cəbhədə vəziyyətin gərginləşməsi olub:
“İki gündən sonra NATO-nun Ukrayna üzrə konfransı keçiriləcək. Alyans Ukraynaya lazımi hərbi dəstəyi verməsə, Rusiyanın Ukraynada yeni ərazilər işğal etməsi mümkün görünür. NATO Baş katibi Kiyevə bütün lazımi silahların verilməsini dəstəkləyir və bunun üçün üzv ölkələrlə intensiv danışıqlar aparır. Buna baxmayaraq, onun səyləri müsbət nəticələnmir. Xüsusilə, Vaşinqtonun mövqeyi burada xüsusi rol oynayır. Hazırda ABŞ diqqətini Yaxın Şərqə yönəldib. Bu region onun üçün daha həyati əhəmiyyət kəsb edir”.
Ekspert bildirib ki, ABŞ həm də Rusiyanın Ukraynada qalib gəlməsinə dözümlü yanaşmayacaq:
“Ukraynanın savaşda Rusiyaya məğlub olması Avropa İttifaqının ABŞ-dən ayrılmasına və yeni ordu yaratmasına, o cümlədən NATO-nun süqutuna gətirib çıxara bilər. Fikrimcə, alyansın toplantısından sonra F-16 qırıcıları və digər raketlərin Ukraynaya tədarükü reallaşa bilər. Danışıqlara gəldikdə isə, savaşın diplomatik həll variantı yoxdur. Rusiya rəhbərliyi bunda maraqlı deyil. Putin növbəti prezidentlik dönəmində Ukraynanı işğal edib yeni ittifaq dövləti yaratmağı planlaşdırır. Amma hesab edirəm ki, il ərzində Ukraynaya yeni silahlar veriləcək və Rusiyaya qarşı hücumların ciddi müsbət nəticələri olacaq”.
Günay