“Bakı-Sumqayıt” yolu problemi həll edilir, tramvay yolları çəkilir..." - Paytaxtın yeni Baş planındakı çatışmazlıqlar nələrdir? 

Ötən gün Bakı şəhərinin izahlı Baş planı təqdim olunub. Planda paytaxtımızda 2040-cı ilədək görüləcək işlər öz əksini tapıb. Burada qeyd olunan bəzi məsələlər artıq vətəndaşlar arasında müzakirə obyektinə çevrilib. Məsələn, layihəyə əsasən, sözügedən ilə qədər “28 May” metrostansiyasının yenidən qurulması, “Bakı-Sumqayıt” yolu probleminin həll edilməsi, 25 yeni metrostansiyanın tikilməsi,  velosiped, tramvay yollarının çəkilməsi  və.s. ilə bağlı məsələlər nəzərdə tutulur.

Sfera.az-ın məlumatına görə, bununla bağlı fikirlərini bölüşən əmlak eksperti Ramil Osmanlı deyib ki, layihədə qeyd olunan məsələlər reallaşarsa, 2040-cı ildə Bakı tamamilə fərqli şəhər olacaq:

“Baş Planda infrastrukturla bağlı geniş proqramların nəzərdə tutulması, ictimai nəqliyyatın inkişafı, avtomobilləşmənin təşviqi, alternativ enerjiyə diqqətin artırılması, yaşıl və sağlam ətraf mühitin inkişaf etdirilməsi təqdirəlayiqdir. Amma ekosistemin əsas sahələrindən biri olan tikinti sektoru, xüsusilə mənzil tikintisi, deyəsən, prioritetlərdən uzaqlaşıb, ya da başqa şəhərlərə doğru uzanıb. Plana əsasən, 2020-ci ildə adambaşına düşən mənzil sahəsi 20,8 kvadrat metr olub, 2027-ci ildə 23,6 kvadratmetr olacaq, 2040-cı ildə isə 24,8 - cəmi 1,2 kvadrat metr artacaq.

Ekspertin sözlərinə görə, layihənin ən maraqlı tərəfi ilkin mərhələsi üçün nəzərdə tutulan “Ulduz” metrostansiyası ətrafındakı 100 hektarlıq sənaye ərazisinin yenidən qurulması və Heydər Əliyev Beynəlxalq Hava Limanı yaxınlığında yeni xidmət sahələrinin inkişafı ilə bağlı prioritetlərdir:

“Xüsusilə, “Ulduz” tərəfdəki sənaye istiqamətinin içərisində ölkənin inşaat materialları idxalının azaldılması sənəddə xüsusi olaraq qabardılır. Amma bunun təqribən 3-4 kilometr ərazidə yaradılacaq 60 hektarlıq Böyükşor ekoloji parkına uyğun olub-olmaması yaddan çıxarılır…Qeyd etdiyim məsələlər hələ ki, ilkin qənaətdir. Sənədi analiz etmək lazımdır”.

R.Osmanlı həmçinin vurğulayıb ki, layihədə ən diqqət çəkən məqamlardan biri də DÖƏ-nin (dövlət-özəl əməkdaşlığı) qurulması məqsədi ilə Köməkçi Korporasiyaların yaradılması məsələsidir:

“Açığı, bu layihəni əvvəlki kimi Asiya ölkələrindən birində fəaliyyət göstərən bir şirkət hazırlamış olsaydı, bu məsələnin üzərindən sakit keçmək olardı. Amma Almaniyada fəaliyyət göstərən bir şirkətin hər fürsətdə əlini dövlətə tərəf, büdcə vəsaitlərinə uzatması maraqlı görünür”.

Günay