"Avropa bu məsələləri həll etsin, sonra..." - Zaxarova Aİ-nin təşəbbüsünü ələ saldı

Rusiya Xarici İşlər Nazirliyinin rəsmisi Mariya Zaxarova ümumavropa ordusunun yaradılmasının mümkünlüyünə şübhə ilə yanaşıb.

Sfera.az xəbər verir ki, o, Telegram-da Avropa İttifaqında (Aİ) elan edilmiş təşəbbüsü ələ salıb.


Zaxarovanın sözlərinə görə, vahid Avropanın silahlı qüvvələri bir sıra problemlərə görə fəaliyyət göstərə bilməyəcək. Onlardan biri kimi o, Aİ-nin enerji qiymətlərindən asılılığına diqqət çəkib. Onun sözlərinə görə, bu, Avropa ordusunun Vaşinqtonun iradəsindən asılılığına gətirib çıxaracaq.

"Brüssel artıq COVID-19 və miqrasiya böhranı kimi qlobal çağırışların öhdəsindən gəlməkdə acizliyini nümayiş etdirdi. Avropa İttifaqı əvvəlcə bu məsələləri həll etməli, yalnız bundan sonra ordu yaratmalıdır", - Rusiya Xarici İşlər Nazirliyinin nümayəndəsi deyib.


Bundan əlavə, Zaxarova qeyd edib ki, ümumavropa ordusunun yaradılması ideyası NATO-nun rolu və onun Avropa dövlətlərinin təhlükəsizliyini təmin etmək qabiliyyəti məsələsini gündəmə gətirir.
 

Qeyd edək ki, İtaliyanın xarici işlər naziri Antonio Tajani vahid Aİ ordusunun yaradılmasına çağırış edib.

Əzizə