“ABŞ-nin Azərbaycanda dini azadlıqlarla bağlı bəyanatı qərəzlidir” -  İlahiyyatçı 

"ABŞ Dövlət Departamentinin Azərbaycan haqqında dinlə bağlı bəyanatı tamamilə əsassız və qərəzlidir. Azərbaycanda dini azadlıqlar yetərincədir, icmalar fəaliyyətini davam etdirir, tolerantlıq mühiti inkişaf etməkdədir".

Sfera.az xəbər verir ki, bunu Milli Cəbhə Partiyasının (MCP) sədr müavini, ilahiyyatçı Tural İrfan deyib.

"ABŞ müsəlman ölkələrində dini, irqi, siyasi yöndə fitnə-fəsad yaratmaqda böyük məharət sahibi kimi Azərbaycanın son dövrdə qüdrətinin daha da artmasından narahatdır. Görünür, ABŞ bəzi başqa müsəlman ölkələrində olduğu kimi, özünün təqdim etdiyi "dini azadlıqlar" adı altında yaratmış olduğu təhlükəli və radikal terror təşkilatlarını dini cərəyan adı ilə Azərbaycanda da inkişaf etdirmək istəyir. Dünənə kimi qaradərililəri adam saymayan, İslamı qəbul etdiyinə görə, milyonlarla vətəndaşına ögey yanaşan, haqsızlıq edən Amerikanın məqsədi məlumdur".

İlahiyyatçının sözlərinə görə, rəsmi Vaşinqton Azərbaycanda vəhhabiliyin daha radikal qollarını inkşaf etdirmək, İranın yaratdığı "Hüseyniyyun" terror təşkilatını bərqərar etmək, "Nurçuluğ"u və onu kimi digər təhlükəli cərəyanları ölkəmizdə yaradıb yaşatmaq amalları tənəzzülə uğradığı üçün bizdə dini azadlıqlar məhdudlaşdırılırmış kimi cəfəng bəyanat verir.

"Bu bəyanat siyasi təxribat, qərəz, məkr ifadə etdiyi, tamamilə əsassız olduğu üçün rədd edilməlidir. Azərbaycandakı dini tolerantlıq bütün dünyada nümunə göstərilir. Bütün dinlərin, məzhəblərin mənsubları mehriban, tolerant şəkildə yaşayır, dini ayinlərini icra edirlər" , -  ilahiyyatçı vurğulayıb.

Ülkər Abdurahmanlı