Ərdoğan Zelenski ilə müzakirələr apardı

Türkiyə Prezident Rəcəb Tayyib Ərdoğan ilə Ukrayna Prezidenti Volodimir Zelenski arasında telefon danışığı olub.


Sfera.az xəbər verir ki, zəngdən sonra Türkiyə prezidentinin Kommunikasiya İdarəsinin bəyanatı yayımlanıb:

"Prezidentimiz cənab Rəcəb Tayyib Ərdoğan ilə Ukrayna Prezidenti Volodimir Zelenski arasında telefon danışığı olub. Görüşdə regional və qlobal problemlər, xüsusilə Ukrayna-Rusiya müharibəsi müzakirə edilib. Prezident Ərdoğan danışıq zamanı bildirib ki, Türkiyə həm Ukraynada, həm də Fələstin torpaqlarında axan qanların dayandırılması və daimi sülhün təmin edilməsi üçün çox səy göstərir".

Məlumatda həmçinin qeyd olunub ki, Türkiyə Ukraynada sülhün təmin edilməsi üçün vasitəçi rolunu öz üzərinə götürməyə və sülh danışıqlarına ev sahibliyi etməyə hazırdır. Türkiyə prezidenti taxıl dəhlizinin yenidən qurulmasının və fəaliyyətə başlamasının vacib olduğunu və bu məqsədlə diplomatik təmasları davam etdirdiyini qeyd edib. O vurğulayıb ki, tezliklə atəşkəs əldə olunmalı və sülh üçün qapı açılmalıdır.

Əzizə