ABŞ-nin dövlət katibi Entoni Blinken Türkiyəyə səfər edəcək.

Sfera.az bildirir ki, səfər Blinkenin Yaxın Şərqə turu çərçivəsində baş tutacaq.

Belə ki, ABŞ Dövlət Departamentindən verilən açıqlamada dövlət katibinin Yaxın Şərqə səfəri zamanı ilk dayanacağının Türkiyə olacağı, daha sonra Yunanıstan, İordaniya, Qətər, Birləşmiş Ərəb Əmirlikləri, Səudiyyə Ərəbistanı, Misir, İsrail və İordan çayının qərb sahilinə gedəcəyi bildirilib.

Blinkenin Türkiyə səfərində regional məsələlərlə yanaşı, İsveçin NATO-ya üzvlüyü və F-16-ların satışının da müzakirə mövzusu olacağı vurğulanıb.

Sözügedən səfər zamanı Blinkenin Türkiyə prezidenti tərəfindən qəbul edilib-edilməyəcəyi hələlik bəlli deyil.

Digər tərəfdən, ABŞ Dövlət Departamentinin sözçüsü Metyu Miller F-16-ların Türkiyəyə satış prosesi ilə bağlı Konqreslə çalışdıqlarını və qanun layihəsinin Baş Assambleyada təsdiqini səbirsizliklə gözlədiklərini bildirib. “Konqresdə maneələrlə qarşılaşdıq, onları ciddi şəkildə aradan qaldırmağa çalışırıq”, deyə o, əlavə edib.

Günay

Sfera.az