Avropa İttifaqı rəsmiləri avro ilə bağlı bəyanat yaydılar
Avropa İttifaqı (Aİ) rəsmiləri 1999-cu il yanvarın 1-dən Aİ-yə üzv ölkələrin vahid valyutası kimi istifadə olunmağa başlayan avronun 25-ci ildönümü münasibətilə birgə təbrik mesajı dərc ediblər.
Sfera.az xəbər verir ki, həmin rəsmilər Aİ Şurasının sədri Şarl Mişel, İrlandiyanın Dövlət Xərcləri və İslahatlar naziri Paskal Donohoe, Avropa Mərkəzi Bankının Prezidenti Kristin Laqard, Aİ Komissiyasının sədri Ursula fon der Leyen və Avropa Parlamentinin sədri Roberta Metsola olub.
“İkinci Dünya Müharibəsindən sonra uzaqgörən liderlər başa düşdülər ki, qitəmizdə sülhə nail olmağın yeganə yolu iqtisadiyyatlarımızı birləşdirməkdir. Bu layihə 25 il əvvəl, 1999-cu il yanvarın 1-də birləşmiş Avropanın zamanla bu sülh dividentindən yaranan iqtisadi faydalardan maksimum yararlanmaq üçün vahid valyutaya ehtiyac duyacağı fikri ilə reallaşıb. Bu gün avro bizə sadəlik, sabitlik və suverenlik bəxş edən gündəlik həyatımızın əvəzsiz hissəsidir.
Dünyanın ikinci ən vacib valyutasının dövriyyəyə buraxılması təlatümlü dünyada bizə daha böyük suverenlik verdi. Ona görə də avrodan istifadə edən ölkələrin sayının 11-dən 20-yə yüksəlməsi təəccüblü deyil. Bu illər ərzində böyük çətinliklər olub, amma hər dəfə düzgün cavablar tapdıq. Hələ işimiz bitməyib. Çünki bu gün biz ölkələrin təkbaşına öhdəsindən gələ bilməyəcəyi yeni çağırışlarla üz-üzəyik və insanlar bunun cavabını Avropada axtarırlar ”,- bəyanatda qeyd olunub.
Firuzə Əliyeva
