ABŞ İsrailə göndərdiyi təyyarədaşıyan gəmini geri çəkəcək? - İDDİA
ABŞ rəhbərliyinin Qəzzada böhranın başlanğıcında İsrailə dəstək məqsədilə Şərqi Aralıq dənizinə göndərdiyi “USS Gerald R. Ford” təyyarə gəmisini yaxın günlərdə geri çəkəcəyi iddia edilib.
Sfera.az xəbər verir ki, Amerikanın “ABC News” kanalına açıqlama verən və adının çəkilməsini istəməyən iki ABŞ rəsmisi oktyabrın ortalarından regionda fəaliyyət göstərən təyyarədaşıyan gəminin missiya təlimatlarının tezliklə dəyişəcəyini bildirib.
Sözügedən rəsmilər qeyd ediblər ki, ölkənin inventarında olan ən böyük və ən yeni təyyarə gəmisi olan “USS Gerald R. Ford” təyyarədaşıyan gəmisi onu müşayiət edən kreyserlər və hücum gəmiləri Şərqi Aralıq dənizini yaxın günlərdə tərk edərək, limana qayıdacaq.
Həmin səlahiyyətlilər bölgədə İsraili dəstəkləmək üçün hələ də çoxlu gəmi və kreyserlərin olduğunu və onların Təl-Əvivə dəstəyinin davam etdiyini əlavə edib.
Hələlik Pentaqondan məsələ ilə bağlı heç bir açıqlama verilməyib.
Xatırladaq ki, 2023-cü il oktyabrın 7-də HƏMAS-ın hücumlarından dərhal sonra ABŞ-nin müdafiə naziri Lloyd Ostin İsrailə kömək etmək üçün təyyarədaşıyan gəmilərin Şərqi Aralıq dənizinə göndərilməsi barədə göstəriş vermişdi.
Firuzə Əliyeva
