Bu gündən G7 və Aİ ölkələrinə Rusiya almazlarının idxalına qadağalar qüvvəyə minir. Martın 1-dən etibarən isə digər ölkələrdə emal edilən rus almazlarına da məhdudiyyətlər qoyulacaq.

Sfera.az TASS-a istinadən xəbər verir ki, yeni məhdudiyyətlər Rusiyada hasil edilmiş, emal edilmiş və ya istehsal edilmiş almazların idxalına aiddir. Qadağa qeyri-kommersiya məqsədli təbii, süni brilyant və almaz zinət əşyalarını da əhatə edir. 

Xüsusi müddəalar 1 martdan 1 sentyabra qədər mərhələli şəkildə tətbiq ediləcək.

Lakin bir çox analitik qadağanın tətbiq olunacağına şübhə ilə yanaşır.

Analitik Aleksey Kalaçev bildirib ki, hazırda almazların yoxlanılması və sertifikatlaşdırılması mexanizmi mövcud deyil, sentyabrın 1-nə qədər hazır olub-olmayacağı isə bilinmir:

“Əgər mexanizm daşların mənşəyinin müəyyən edilməsinin texniki üsullarına əsaslanırsa, bahalı və çox da səmərəli olmayan texnologiya olsa da, onu tez bir zamanda tətbiq etmək mümkün olacaq.Əgər brilyantların izlənilməsi mexanizmi blokçeyn texnologiyalarına əsaslanırsa, belə bir sistemin tətbiqi üçün illər lazım olacaq”.

Analitik Olqa Belenkaya isə bildirib ki, Rusiya bu məhdudiyyətlərdən yayına bilməyəcək:

"Brilyantlar Rusiya ixracatının nisbətən kiçik bir hissəsini təşkil edir. Bu sanksiyalar üzrə əsas risklər Rusiyanın almaz nəhəngi "Alrosa"ya aiddir. Nəzərə alsaq ki, Rusiya qlobal bazarda almazların əsas tədarükçülərindən biridir, qadağadan yayına bilməyəcək”.

Firuzə Əliyeva