Dünya üçün BÖYÜK TƏHLÜKƏ: “Bu ölkələr nüvə sınaqları keçirə bilər”

“Vaşinqton Çinin nüvə gücünü artırmasından narahatdır”.

Sfera.az bildirir ki, bunu politoloq Elxan Şahinoğlu deyib.

O qeyd edib ki, Pekin nüvə silahlarının istehsalında Vaşinqtondan geri qalmaq istəmir:

“Çin nüvə istehsalını artırmaqla yanaşı, onların gücünü yoxlamaq barədə də düşünə bilər. ABŞ kəşfiyyatı Çinin şimalındakı səhralıqda böyük şaxtalar inşa etdiyini deyib. Vaşinqton bu qənaətə gəlib ki, Pekin həmin bölgədə nüvə sınağı keçirməyə hazırlaşır. Çin 1964-cü ildə məhz həmin bölgədə ilk nüvə bombasını sınaqdan keçirmişdi. Digər tərəfdən, Rusiya və ABŞ də öz ərazilərində nüvə poliqonları inşa edirlər”.

Ekspertin sözlərinə görə, Pekində hesab edirlər ki, yaxın illərdə “Nüvə sınaqlarının hərtərəfli qadağan edilməsi haqqında Müqavilə”dən çıxmaq istəyən dövlətlər ola bilər:

“ABŞ sonuncu nüvə sınağını 1992, Rusiya 1991,  Çin isə müqaviləyə qoşulduğu 1996-cı ildə keçirib. ABŞ müqavilənin ratifikasiyasını uzatdığına görə, Çin də müqaviləni ratifikasiya etməyə tələsmədi. Beynəlxalq aləmdə baş verən gərginliklər, o cümlədən Rusiya-ABŞ və Çin-ABŞ münasibətləri fonunda sözügedən müqavilə ətrafında polemikalar artıb. Hər hansı dövlət nüvə sınağı keçirərsə, bu, müqavilənin məhvinə gətirib çıxaracaq. Bundan sonra digər dövlətlər də nüvə sınaqlarına başlayacaqlar”.

Günay